മഞ്ചേരി-പലചരക്ക് കടക്ക് പെട്രോള്‍ ഒഴിച്ച് തീയിട്ട യുവാവിനെ മഞ്ചേരി പോലീസ് അറസ്റ്റ് ചെയ്തു. മഞ്ചേരി മേലാക്കം കോഴിക്കാട്ടുകുന്ന് ഷൈമോനെ (45)യാണ് അറസ്റ്റ് ചെയ്തത്. കടയില്‍ സാധനം വാങ്ങാനെത്തിയ ആള്‍ ഷൈമോന്റെ ഭാര്യയെ പറ്റി മകനോട് അപവാദം പറഞ്ഞുവെന്നാരോപിച്ചാണ് മദ്യപിച്ചെത്തിയ പ്രതി കടക്ക് തീയിട്ടത്. കോഴിക്കാട്ട്കുന്നിലെ സിത്തു സ്റ്റോറിനാണ് കുപ്പിയില്‍ കൊണ്ടുവന്ന പെട്രോള്‍ ഒഴിച്ച് തീയിട്ടത്. മേലാക്കം കോഴിക്കാട്ടുകുന്ന് സബ് സ്റ്റേഷനു സമീപം താമസിക്കുന്ന ഏലായി നിസാര്‍ ആണ് കടയുടമ. കടയുടമ ഭക്ഷണം കഴിക്കാന്‍ വീട്ടില്‍ പോയതിനാല്‍ സംഭവം നടക്കുമ്പോള്‍ ജീവനക്കാരന്‍ മാത്രമായിരുന്നു കടയിലുണ്ടായിരുന്നത്. ഭാഗികമായി കത്തിയ കടക്ക് ഒരു ലക്ഷം രൂപ നഷ്ടം സംഭവിച്ചതായി കടയുടമ പറഞ്ഞു. അരി, പഞ്ചസാര, ചായപ്പൊടി, ഫ്രീസര്‍, സ്റ്റേഷനറി സാധനങ്ങള്‍ എന്നിവ കത്തി നശിച്ചു. പ്രതിയെ മഞ്ചേരി ചീഫ് ജുഡീഷ്യല്‍ മജിസ്ട്രേറ്റ് എം.എ അഷ്റഫ് 14 ദിവസത്തേക്ക് റിമാന്‍ഡ് ചെയ്തു. പോലീസും ഫോറന്‍സിക് വിദഗ്ധരും സ്ഥലത്തെത്തി പരിശോധന നടത്തി.
കൂടുതല് വായിക്കുക
ഈ വിഭാഗത്തിൽ പോസ്റ്റ് ചെയ്ത അനുബന്ധ ലേഖനങ്ങൾ അടങ്ങിയിരിക്കുന്നു (Related Nodes field)
