കണ്ണൂര്‍ : ആകാശ് തില്ലങ്കേരിയെ പിന്തുണക്കുന്നവര്‍ക്കെതിരെ കര്‍ശന നടപടിയുമായി സി പി എം. ആകാശിനെ പിന്തുണയ്ക്കുന്നവര്‍ പാര്‍ട്ടിയിലുണ്ടാകില്ലെന്നാണ് സി പി എം നേതൃത്വം മുന്നറിയിപ്പ് നല്‍കിയിരിക്കുന്നത്. പാര്‍ട്ടി അംഗങ്ങളായ യുവാക്കളില്‍ ചിലര്‍ ആകാശുമായി അടുപ്പം പുലര്‍ത്തുന്നതായും ഇവരുടെ പിന്‍ബലത്തിലാണ് ആകാശ് പാര്‍ട്ടിക്കെതിരെ തിരിയുന്നതെന്നും പാര്‍ട്ടി നേതൃത്വം കണ്ടെത്തിയിരുന്നു.
സി പി എം തില്ലങ്കേരി ലോക്കല്‍ കമ്മറ്റി അംഗങ്ങള്‍ക്കാണ് സി പി എം ജില്ലാ നേതൃത്വം താക്കീത് നല്‍കിയത്. ആകാശിനെ സഹായിക്കുന്നവര്‍ പാര്‍ട്ടിയിലുണ്ടാകില്ലെന്ന് നേതൃത്വം വ്യക്തമാക്കി. പാര്‍ട്ടി ജില്ലാ സെക്രട്ടറി എം വി ജയരാജന്‍ പങ്കെടുത്ത ലോക്കല്‍ കമ്മിറ്റി യോഗത്തിലാണ് താക്കീത് നല്‍കിയത്. ആകാശിന് പാര്‍ട്ടിക്കുള്ളില്‍ നിന്നു തന്നെ പിന്തുണ കിട്ടുന്നത് നേതൃത്വത്തെ വലിയ തോതില്‍ അലട്ടുന്നുണ്ട്. പാര്‍ട്ടിയില്‍ ചിലരുടെ പിന്‍ബലത്തിലാണ് ആകാശ് പാര്‍ട്ടിക്കെതിരെ കഴിഞ്ഞ ദിവസം ഫെയ്‌സ് ബുക്ക് പോസ്റ്റിട്ടത്. എന്നാല്‍ സി പി എം സംസ്ഥാന നേതൃത്വം ഈ വിഷയത്തില്‍ ഗൗരവമായ ഇടപെടല്‍ നടത്തിയതോടെ പാര്‍ട്ടിയുമായി ഇനിയും ഏറ്റുമുട്ടല്‍ നടത്തുന്നത് ദോഷം ചെയ്യുമെന്നാണ് ആകാശിന്റെയും കൂട്ടാളികളുടെയും നിലപാട്.
കൊലപാത രാഷ്ട്രീയത്തില്‍ സി പി എമ്മിനെ വെട്ടിലാക്കി നിര്‍ണായക വെളിപ്പെടുത്തലുമായി കഴിഞ്ഞ ദിവസം ആകാശ് തില്ലങ്കേരി രംഗത്തെത്തിയതോടെയാണ് ഇത് സംബന്ധിച്ച വിവാദങ്ങള്‍ തുടങ്ങിയത്. പാര്‍ട്ടിക്ക് വേണ്ടി കൊലപാതകം നടത്തിയെന്ന് ഷുഹൈബ് വധക്കേസിലെ ഒന്നാം പ്രതിയായ ആകാശ് തില്ലങ്കേരി ഫേസ്ബുക്ക് കമന്റിലൂടെ വെളിപ്പെടുത്തുകയായിരുന്നു. എടയന്നൂരിലെ പാര്‍ട്ടി നേതാക്കളാണ് ഞങ്ങളെക്കൊണ്ടത് ചെയ്യിച്ചതെന്നും ആകാശ് തുറന്നടിച്ചു. ഡി വൈ എഫ ്‌ഐ ബ്ലോക്ക് സെക്രട്ടറിയുടെ എഫ് ബി പോസ്റ്റിന് കമന്റായാണ് ആകാശ് നിര്‍ണായക വിവരങ്ങള്‍ തുറന്നെഴുതിയത്.
എടയന്നൂരിലെ പാര്‍ട്ടി നേതാക്കളാണ് ഞങ്ങളെക്കൊണ്ട് കൊലപാതകം നടത്തിച്ചത്. ഞങ്ങള്‍ വാ തുറന്നാല്‍ പലര്‍ക്കും പുറത്തിറങ്ങി നടക്കാനാകില്ല. ആഹ്വാനം ചെയ്തവര്‍ക്ക് പാര്‍ട്ടി സഹകരണ സ്ഥാപനങ്ങളില്‍ ജോലി കിട്ടി. നടപ്പിലാക്കിയ ഞങ്ങള്‍ക്ക് പട്ടിണിയും പടിയടച്ച് പിണ്ടം വെയ്ക്കലുമാണ് നേരിടേണ്ടി വന്നത്. പാര്‍ട്ടി തള്ളിയതോടെയാണ് തങ്ങള്‍ സ്വര്‍ണ്ണക്കടത്ത് ക്വട്ടേഷനിലേക്ക് തിരിഞ്ഞത്. തെറ്റിലേക്ക് പോകാതിരിക്കാനോ തിരുത്തിക്കാനോ പാര്‍ട്ടി ശ്രമിച്ചില്ല. ക്ഷമ നശിച്ചതുകൊണ്ടാണ് ഇപ്പോള്‍ തുറന്നുപറയുന്നതെന്നും ആകാശ് വെളിപ്പെടുത്തിയിരുന്നു.
കഴിഞ്ഞ ദിവസങ്ങളിലായി ആകാശ് തില്ലങ്കേരിയും ഇയാളെ അനുകൂലിക്കുന്ന സംഘവും സി പി എം പ്രാദേശിക നേതാക്കളും തമ്മില്‍ ഫേസ് ബുക്കിലൂടെ വാക്ക് തര്‍ക്കങ്ങളുണ്ടായിരുന്നു. ഡി വൈ എഫ് ഐ നേതാവ് ഷാജര്‍, ആകാശിന് ട്രോഫി നല്‍കിയതുമായി ബന്ധപ്പെട്ടുണ്ടായ വിവാദങ്ങളാണ് സമൂഹമാധ്യമങ്ങളിലും തുടര്‍ന്നത്. ഷാജറിനെ കുടുക്കുന്നതിന് വേണ്ടി ആകാശ് മനപൂര്‍വ്വമുണ്ടാക്കിയതാണ് പ്രശ്‌നങ്ങളെന്നാണ് ഒരു വിഭാഗം നേതാക്കളുടെ ആരോപണം. ഇതിന്റെ തെളിവുകളും പുറത്തുവിട്ടിരുന്നു. ഇതിന് പിന്നാലെ സരീഷ് എന്ന ഡി വൈ എഫ് ഐ നേതാവിട്ട പോസ്റ്റിന് കമന്റായാണ് ആകാശ് വെളിപ്പെടുത്തലുകള്‍ നടത്തിയത്. പാര്‍ട്ടിക്ക് വേണ്ടി കൊലപാതകം നടത്തിയെന്ന ആകാശിന്റെ വാക്കുകള്‍ വാര്‍ത്തയായതോടെ ആകാശ് തില്ലങ്കേരിയെ പരാമര്‍ശിക്കുന്ന പോസ്റ്റ് ഡി വൈ എഫ് ഐ ബ്ലോക്ക് സെക്രട്ടറി സരീഷ് ഡിലീറ്റ് ചെയ്തു.
കൂടുതല് വായിക്കുക
ഈ വിഭാഗത്തിൽ പോസ്റ്റ് ചെയ്ത അനുബന്ധ ലേഖനങ്ങൾ അടങ്ങിയിരിക്കുന്നു (Related Nodes field)
