ഗാസ- മൂന്ന് അമേരിക്കൻ സൈനികർ കൊല്ലപ്പെട്ട ജോർദാൻ- സിറിയ അതിർത്തിയിലെ ഡ്രോൺ ആക്രണമത്തിന്റെ ഉത്തരവാദിത്തമേറ്റ് ഇറാഖിലെ ഇസ്‌ലാമിക് റെസിസ്റ്റൻസ് എന്ന സംഘടന. ഞായറാഴ്ച രാത്രി നടന്ന ആക്രമണത്തിൽ 34 പേർക്ക് പരിക്കേൽക്കുകയും ചെയ്തിരുന്നു. ഒക്ടോബർ ഏഴിനുശേഷം ഗാസയിൽ യുദ്ധം തുടരവേ മേഖലിയിൽ അമേരിക്കൻ സൈനികർ കൊല്ലപ്പെടുന്നത് ഇതാദ്യമാണ്.
ഇറാൻ പിന്തുണയോടെ ഇറാഖിൽ പ്രവർത്തിക്കുന്ന സായുധ സംഘങ്ങളുടെ കൂട്ടായ്മയാണ് ആക്രമണത്തിന്റെ ഉത്തരവാദിത്തമേറ്റ ഇസ്‌ലാമിക് റെസിസ്റ്റൻസ് ഗ്രൂപ്പ്. എന്നാൽ തങ്ങൾക്ക് ഈ ആക്രമണത്തിൽ പങ്കില്ലെന്ന് ഇറാൻ വ്യക്തമാക്കി. ആക്രമണത്തെ സൗദി അറേബ്യ അപലപിച്ചു. ആക്രമണത്തിന് തക്ക തിരിച്ചടിയുണ്ടാവുമെന്ന് അമേരിക്കൻ പ്രസിഡന്റ് ജോ ബൈഡൻ മുന്നറിയിപ്പ് നൽകി. ആക്രമണത്തിന് പിന്നിൽ ഇറാൻ തന്നെയാണെന്ന് അമേരിക്ക ആരോപിച്ചിരുന്നു.
ഗാസയിൽ ഇസ്രായിൽ സേയുടെ നരഹത്യ തുടരുകയാണ്. രൂക്ഷയുദ്ധം നടക്കുന്ന ഖാൻ യൂനിസിൽനിന്ന് കൂടുതൽ പേരെ തെക്കൻ പട്ടണമായ റഫായിലേക്ക് ആട്ടിടപ്പായിച്ചുകൊണ്ടാണ് ഇസ്രായിൽ ആക്രമണം തുടരുന്നത്. അൽനസ്സർ അടക്കം ഖാൻ യൂനിസിലെ ആശുപത്രികളെല്ലാം തകർക്കപ്പെട്ടു. ഗാസ സിറ്റിയിൽ ഇസ്രായിൽ ആക്രമണത്തിൽ 25ഓളം സിവിലിയൻമാർ കൊല്ലപ്പെട്ടു. ഒക്ടോബർ ഏഴിനുശേഷം 26,637 ഫലസ്തീനികളാണ് ഇസ്രായിൽ ആക്രമണത്തിൽ കൊല്ലപ്പെട്ടതെന്ന് ഗാസ ആരോഗ്യ വകുപ്പ് അറിയിച്ചു. പരിക്കേറ്റവർ 65,387 ആണ്. വെസ്റ്റ് ബാങ്കിൽ ഇന്നലെ ഇസ്രായിൽ നടത്തിയ ആക്രമണത്തിൽ അഞ്ച് ഫലസ്തീനികൾ കൊല്ലപ്പെട്ടു.
തെൽ അവീവിലേക്ക് ഇന്നലെ ഹമാസിന്റെ റോക്കറ്റാക്രമണമുണ്ടായി. ദിവസങ്ങൾക്കുശേഷമാണ് തെൽഅവീവ് ആക്രമിക്കപ്പെടുന്നത്. നഗരത്തിൽ അപായ സയറണുകൾ മുഴങ്ങി. റോക്കറ്റുകളെ ഇസ്രായിൽ പ്രതിരോധ സംവിധാനം ആകാശത്തുവെച്ച് തകർത്തു. അതിനിടെ, ഗാസയിൽ കുടിയേറ്റം ആരംഭിക്കുന്നതിനുള്ള പദ്ധതിയുമായി ഇസ്രായിലിലെ തീവ്രവലതുപക്ഷം രംഗത്തെത്തി. ഗാസയിലേക്ക് മടങ്ങൂന്ന എന്ന കാമ്പയിരുമായാണ് ജൂത കുടിയേറ്റക്കാരെ അവിടെ എത്തിക്കുന്നതിനുള്ള നീക്കം ആരംഭിച്ചിട്ടുള്ളത്. അമേരിക്കയും ജർമനിയും ഈ നീക്കത്തിനെതിരെ മുന്നറിയിപ്പ് നൽകി. ഗാസയിലെ യു.എൻ ദുരിതാശ്വാസ ഏജൻസിയായ യു.എൻ.ആർ.ഡബ്ല്യു.എക്കുള്ള സഹായം നിർത്തിവെച്ചതായി യൂറോപ്യൻ യൂനിയനും അറിയിച്ചു.
കൂടുതല് വായിക്കുക
ഈ വിഭാഗത്തിൽ പോസ്റ്റ് ചെയ്ത അനുബന്ധ ലേഖനങ്ങൾ അടങ്ങിയിരിക്കുന്നു (Related Nodes field)
