ഗാസ- ഗാസയിലേക്ക് അവശ്യവസ്തുക്കളെത്തിക്കാന്‍ ഇസ്രായില്‍ അനുവദിക്കുന്നില്ലെന്ന് ഐക്യരാഷ്ട്രസഭ അറിയിച്ചു. ഒക്‌ടോബര്‍ ഏഴുമുതല്‍ ജീവന്‍ രക്ഷാ ഇന്ധനങ്ങള്‍ ലഭിക്കുന്നില്ല. 23 ലക്ഷം ഫലസ്തീനികളുടെ ജീവന്‍ അപകടത്തിലാണെന്നും യു.എന്‍ പറഞ്ഞു. യുദ്ധം ഒരുമാസം പിന്നിടുമ്പോള്‍ ദുരന്തം സങ്കല്‍പിക്കാനാകാത്ത അനുപാതത്തിലേക്ക് നീങ്ങുകയാണെന്ന് സെക്രട്ടറി ജനറല്‍ അന്റോണിയോ ഗുട്ടെറസ് പറഞ്ഞു.
ഗാസയിലെ ഇസ്രായില്‍ ആക്രമണങ്ങളില്‍ മരിച്ചവരുടെ എണ്ണം 10328 ആയതായി ഗാസ ആരോഗ്യ മന്ത്രാലയം അറിയിച്ചു. പതിനായിരം കുട്ടികളടക്കം 24,800 പേര്‍ക്ക് പരിക്കേറ്റു. ഗാസയിലെ ജനസംഖ്യയുടെ 60 ശതമാനവും നാടുവിട്ടോടാന്‍ നിര്‍ബന്ധിതരായി.
ഇസ്രായിലിന്റെ സൈനിക നടപടി ഗാസയുടെ വടക്കന്‍ പകുതിയില്‍ കേന്ദ്രീകരിച്ചിരിക്കുകയാണെങ്കിലും തെക്കുഭാഗവും നിരന്തര ആക്രമണത്തിനിരയാകുന്നുണ്ട്. തെക്കന്‍ ഗാസ നഗരങ്ങളായ ഖാന്‍ യൂനിസിലും റഫയിലും ചൊവ്വാഴ്ച പുലര്‍ച്ചെ രണ്ട് വ്യത്യസ്ത ഇസ്രായിലി വ്യോമാക്രമണങ്ങളില്‍ 23 പേരെങ്കിലും കൊല്ലപ്പെട്ടതായി ഫലസ്തീന്‍ ആരോഗ്യ ഉദ്യോഗസ്ഥര്‍ പറഞ്ഞു.
