ബെംഗളൂരു - മലയാളി യുവാവിനെയും നഴ്‌സിങ് വിദ്യാർത്ഥിനിയായ ബംഗാളി യുവതിയെയും ബെംഗളൂരുവിലെ അപ്പാർട്ട്‌മെന്റിനുള്ളിൽ തീകൊളുത്തി മരിച്ച നിലയിൽ കണ്ടെത്തി. ഇടുക്കി സ്വദേശി അബിൽ ഏബ്രഹാം (29), കൊൽക്കത്ത സ്വദേശിനി സൗമിനി ദാസ് (20) എന്നിവരെയാണ് കൊത്തന്നൂർ ദൊഡ്ഡഗുബ്ബിയിലെ അപ്പാർട്ട്‌മെന്റിൽ മരിച്ച നിലയിൽ കണ്ടെത്തിയത്. കഴിഞ്ഞദിവസം വൈകിട്ടാണ് സംഭവം.
ഇരുവരും മൂന്നുദിവസം മുമ്പാണ് അപ്പാർട്ടുമെന്റിൽ ഒരുമിച്ച് താമസം തുടങ്ങിയത്. വിവാഹിതയായ യുവതി മാറത്തഹള്ളിയിലെ സ്വകാര്യ നഴ്‌സിങ് കോളജിലെ രണ്ടാംവർഷ വിദ്യാർത്ഥിനിയാണ്. നഴ്‌സിങ് റിക്രൂട്ട്മെന്റ് ഏജൻസി ഉടമയായ അബിൽ അവിവാഹിതനാണ്. മൃതദേഹം പോസ്റ്റ്‌മോർട്ടത്തിനായി വിക്ടോറിയ ആശുപത്രി മോർച്ചറിയിലേക്ക് മാറ്റി. സംഭവത്തിൽ കേസെടുത്ത് കൂടുതൽ അന്വേഷണങ്ങൾ നടത്തിവരികയാണെന്ന് കൊത്തന്നൂർ പോലീസ് പ്രതികരിച്ചു.
