മുംബൈ- ബോളിവുഡ് താരം ഷാരൂഖ് ഖാന് സുരക്ഷ ശക്തമാക്കി മഹാരാഷ്ട്ര പോലീസ്. വൈ പ്ലസ് കാറ്റഗറി സുരക്ഷയാണ് താരത്തിന് ഏര്‍പ്പെടുത്തിയിരിക്കുന്നത്. പഠാന്‍, ജവാന്‍ എന്നിങ്ങനെ രണ്ട് വമ്പന്‍ ഹിറ്റുകളാണ് ഈ വര്‍ഷം ഷാരൂഖ് ബോളിവുഡിന് നല്‍കിയത്. ഇതിനു പിന്നാലെ താരത്തിന്റെ ജീവന് ഭീഷണി വര്‍ധിച്ചുവെന്നാണ് ഇന്റലിജന്‍സ് റിപ്പോര്‍ട്ട്. ഇതിന്റെ അടിസ്ഥാനത്തിലാണ് സുരക്ഷ.
സുരക്ഷയുടെ ഭാഗമായി ഷാരൂഖിനൊപ്പം മഹാരാഷ്ട്ര പോലീസിന്റെ സ്‌പെഷ്യല്‍ പ്രൊട്ടക്ഷന്‍ ടീമിലുള്ള ആറ് സായുധ പോലീസ് കമാന്റോകള്‍ ഉണ്ടാകും. രാജ്യത്തിനകത്ത് എല്ലാ സ്ഥലത്തും കമാന്റോകളുടെ സുരക്ഷാവലയത്തിലായിരിക്കും ഷാരൂഖിന്റെ യാത്ര. യന്ത്രത്തോക്കുകള്‍, എകെ47 ആക്രമണ റൈഫിളുകള്‍, ഗ്ലോക്ക് പിസ്റ്റളുകള്‍ എന്നിവയാണ് കമാന്റോകളുടെ ആയുധം. മുംബൈയിലെ ഷാരൂഖിന്റെ വസതിയായ മന്നത്തിനും സുരക്ഷ ഏര്‍പ്പെടുത്തിയിട്ടുണ്ട്. മുഴുവന്‍ സമയവും നാല് പോലീസുകാരുടെ കാവലിലായിരിക്കും മന്നത്ത്. സുരക്ഷക്കുള്ള പണം നല്‍കുന്നത് ഷാരൂഖ് തന്നെയാണ്.
