പുതിയ ചിത്രമായ ജവാന് റിലീസാകുന്നതിന് മുന്നോടിയായി ബോളിവുഡ് താരം ഷാരൂഖ് ഖാനും മകള്‍ സുഹാനാ ഖാനും തിരുപ്പതി ശ്രീ വെങ്കിടേശ്വര സ്വാമി ക്ഷേത്രത്തില്‍ ദര്‍ശനം നടത്തി. ചിത്രത്തിലെ നായിക നയന്‍താരയ്ക്കും ഭര്‍ത്താവ് വിഘ്‌നേഷ് ശിവനുമൊപ്പമാണ് ഷാരൂഖ് തിരുപ്പതിയിലെത്തിയത്.
കുറച്ച് നാളുകള്‍ക്ക് മുന്‍പ് ഷാരൂഖ് ഖാന്‍ കശ്മീരിലെ വൈഷ്‌ണോ ദേവി ക്ഷേത്രത്തില്‍ ദര്‍ശനം നടത്തിയിരുന്നു. ഈ രംഗങ്ങള്‍ സമൂഹമാധ്യമങ്ങളില്‍ വൈറലായിരുന്നു.
അറ്റ്‌ലീ സംവിധാനം ചെയ്ത ജവാന് മികച്ച പ്രീബുക്കിങാണ് ലഭിച്ചുകൊണ്ടിരിക്കുന്നത്. സെപ്റ്റംബര്‍ 7 ന് റിലീസ് ചെയ്യുന്ന ചിത്രത്തിന്റെ ബുക്കിംഗ് ആരംഭിച്ച പല സിറ്റികളിലും വളരെ വേഗത്തിലാണ് ടിക്കറ്റുകള്‍ വിറ്റുതീര്‍ന്നത്. പലയിടത്തും ടിക്കറ്റ് നിരക്കിലും വന്‍ കുതിപ്പാണ് രേഖപ്പെടുത്തുന്നത്. ഷാറൂഖിന്റെ പഠാന്‍ സിനിമയെക്കാള്‍ കലക്ഷന്‍ ജവാന് നേടുമെന്നാണ് സൂചന.
മുംബൈയിലും ഡല്‍ഹിയിലും ടിക്കറ്റുകള്‍ക്ക് 2400 രൂപ വരെ ഈടാക്കുന്നുണ്ടെന്ന് റിപ്പോര്‍ട്ടുകള്‍ സൂചിപ്പിക്കുന്നു. ആദ്യദിനം ആഗോളതലത്തില്‍ ജവാന് 100 കോടിയിലേറെ നേടുമെന്നാണ് അനലിസ്റ്റുകള്‍ പ്രവചിക്കുന്നത്. അങ്ങനെ സംഭവിച്ചാല്‍ ഈ നേട്ടം സ്വന്തമാക്കുന്ന രണ്ടാമത്തെ ചിത്രമാകും ജവാന്. സിദ്ധാര്‍ഥ് ആനന്ദ് സംവിധാനം ചെയത പഠാന്‍ ആദ്യദിനം 100 കോടി ക്ലബ്ബില്‍ കയറിയിരുന്നു.
