കന്യാകുമാരി - സനാതനധര്‍മ്മത്തെ ഉന്മൂലനം ചെയ്യണമെന്ന് ആഹ്വാനം ചെയ്ത തമിഴ്‌നാട് മന്ത്രി ഉദയനിധി സ്റ്റാലിനെതിരെ ഹിന്ദുത്വവാദികള്‍ വലിയ പ്രതിഷേധമാണുയര്‍ത്തുന്നത്. എന്നാല്‍ ഇത് ആദ്യമായി പറഞ്ഞത് ഉദയനിധിയല്ലെന്നും മുഖ്യമന്ത്രിമാരായ എം.കെ. സ്റ്റാലിനും പിണറായി വിജയനും ഇക്കാര്യം നേരത്തെ ചൂണ്ടിക്കാണിച്ചതാണെന്നുമാണ് പുതിയ വാര്‍ത്ത.
ഈ വര്‍ഷം മാര്‍ച്ചില്‍ നാഗര്‍കോവിലില്‍ നടന്ന ഒരു ചടങ്ങിലാണ് കേരള മുഖ്യമന്ത്രി പിണറായി വിജയനും തമിഴ്‌നാട് മുഖ്യമന്ത്രി എം.കെ സ്റ്റാലിനും അതിനെക്കുറിച്ച് പറഞ്ഞത്:
തിരഞ്ഞെടുപ്പ് നേട്ടത്തിനായി ജനങ്ങളെ മതത്തിന്റെ പേരില്‍ ഭിന്നിപ്പിക്കാനാണ് ബി.ജെ.പി ശ്രമിക്കുന്നത്. എല്ലാ പ്രശ്‌നങ്ങള്‍ക്കും പരിഹാരമായി അവര്‍ സനാതന ധര്‍മ്മത്തെ കാണുന്നു. എന്നാല്‍ ചാന്നാര്‍ കലാപത്തിന്റെ ചരിത്രം സനാതന ധര്‍മ്മം എന്ന് വിളിക്കപ്പെടുന്ന ക്രൂരമായ ആചാരങ്ങളെ തുറന്നുകാട്ടുന്നു - പിണറായി വിജയന്‍
തിരുവിതാംകൂര്‍ സംസ്ഥാനത്ത് നടപ്പാക്കിയ സനാതന ധര്‍മ്മം തന്നെയാണ് ബി.ജെ.പിയും ആര്‍.എസ്.എസും ഇപ്പോള്‍ നടപ്പാക്കാന്‍ ആഗ്രഹിക്കുന്നത്. ഈ ധര്‍മ്മം ജനങ്ങളെ ഭിന്നിപ്പിക്കുന്നു, അതേസമയം ദ്രാവിഡ മാതൃക എല്ലാ ആളുകളെയും ഒന്നായി കണക്കാക്കുന്നു- എം.കെ സ്റ്റാലിന്‍
1800 കളില്‍ തിരുവിതാംകൂര്‍ നാട്ടുരാജ്യത്തില്‍ (ഇന്നത്തെ കേരളം) നടന്ന 'ചാന്നാര്‍ കലാപം' അഥവാ മേല്‍വസ്ത്ര പ്രസ്ഥാനത്തിന്റെ 200 ാം വാര്‍ഷികം അനുസ്മരിക്കുന്നതിനാണ് ഈ സമ്മേളനം നടന്നത്. അക്കാലത്ത് തിരുവിതാംകൂര്‍ സാമ്രാജ്യം പതിനെട്ടോളം ജാതി വിഭാഗങ്ങളെ 'അവര്‍ണ്ണര്‍' എന്ന് തരംതിരിച്ചിരുന്നു. മേല്‍ ശരീരം മറയ്ക്കാനുള്ള അവകാശത്തിനായി നാടാര്‍ സ്ത്രീകള്‍ ഒരു സാമൂഹിക പ്രക്ഷോഭം നയിച്ചു; പ്രബല ജാതി സ്ത്രീകള്‍ക്ക് മാത്രമേ അവരുടെ ശരീരം മറയ്ക്കാന്‍ അന്ന് അവകാശമുണ്ടായിരുന്നുള്ളു.
രണ്ട് മുഖ്യമന്ത്രിമാരും 'ജനാധിപത്യ ശക്തികളോട്' പൊതു തെരഞ്ഞെടുപ്പിനെ ഒരുമിച്ച് നേരിടാനും ഭാരതത്തിന്റെ മതേതര, ഫെഡറല്‍ തത്വങ്ങളെ തകര്‍ക്കുന്ന ഭാരതീയ ജനതാ പാര്‍ട്ടിയുടെ ഭരണം അവസാനിപ്പിക്കാനും ആഹ്വാനം ചെയ്തിരുന്നു.
സി.പി.എം മുന്‍ പാര്‍ലമെന്റ് അംഗവും നാഗര്‍കോവില്‍ സമ്മേളനത്തിന്റെ കണ്‍വീനറുമായ എ വി ബെല്ലാര്‍മിന്‍ അന്ന് പറഞ്ഞത് ഇങ്ങനെ: സനാതന ധര്‍മ്മം നടപ്പാക്കുന്നത് ജനങ്ങളെ സവര്‍ണമായും അവര്‍ണമായും വിഭജിച്ചിരിക്കുന്നു. തൊഴിലാളി വര്‍ഗക്കാരെ അവര്‍ണരായി തരംതിരിക്കുകയും നിരവധി അടിസ്ഥാന അവകാശങ്ങള്‍ നിഷേധിക്കപ്പെടുകയും ചെയ്തു. സനാതന ധര്‍മ്മം ഭരിക്കുന്ന രാജ്യം അവരെ പാദരക്ഷകള്‍ ഉപയോഗിക്കാനും കുടകള്‍ ഉപയോഗിക്കാനും അനുവദിച്ചില്ല; കൂടാതെ, അടിമത്തം നടപ്പിലാക്കുകയും തൊഴിലാളികളെ വില്‍ക്കുകയോ പണയപ്പെടുത്തുകയോ ചെയ്യാന്‍ അനുവദിക്കുകയും ചെയ്തു.
നാടാര്‍, ഈഴവര്‍ എന്നിവരുള്‍പ്പെടെ 18 അവര്‍ണ ജാതി വിഭാഗങ്ങളിലെ സ്ത്രീകളുടെ 'മുലനികുതി' ആയിരുന്നു അക്കാലത്ത് നിലനിന്നിരുന്ന മറ്റൊരു ക്രൂരമായ ആചാരം. നികുതിയില്‍ പ്രതിഷേധിച്ച് മുലകള്‍ മുറിച്ചുമാറ്റിയ 'നങ്ങേലി'യുടെ മരണം, ക്രൂരമായ ആചാരത്തിനെതിരായ പ്രക്ഷോഭങ്ങള്‍ ശക്തമാക്കുകയും 'തോല്‍ ശീലൈ പോരാട്ടം' (തമിഴില്‍) അല്ലെങ്കില്‍ 'മേല്‍ മുണ്ട് സമരം' (മലയാളത്തില്‍) എന്നിവയുടെ അടിത്തറയായി മാറുകയും ചെയ്തു.
ജോലിക്ക് വൈകിയെത്തിയ ഗര്‍ഭിണിയായ സ്ത്രീയെ വയലില്‍ ഉഴുതുമറിക്കാന്‍ കാളക്കൊപ്പം കെട്ടിയ സംഭവമുള്‍പ്പെടെ നിരവധി മനുഷ്യത്വരഹിതമായ രീതികള്‍ ചരിത്രകാരന്മാര്‍ രേഖപ്പെടുത്തിയിട്ടുണ്ട്. സനാതന ധര്‍മ്മം നടപ്പിലാക്കിയ മറ്റൊരു നിയമമായിരുന്നു രാജ്യത്തിന് കൂലിയില്ലാത്ത ജോലിയെന്നും അദ്ദേഹം പറഞ്ഞു.
