മുംബൈ- അയോധ്യയിൽ രാമക്ഷേത്ര ഉദ്ഘാടന വേളയിൽ ഗോധ്ര പോലുള്ള സംഭവം നടക്കുമോ എന്ന ഭയം ജനങ്ങളുടെ മനസ്സിലുണ്ടെന്ന് ശിവസേന (യുബിടി) നേതാവും രാജ്യസഭാ എംപിയുമായ സഞ്ജയ് റാവത്ത് പറഞ്ഞു. 2024 ലെ പൊതു തിരഞ്ഞെടുപ്പ് വിജയിക്കാൻ ബി.ജെ.പി എന്തും ചെയ്യുമെന്ന് അദ്ദേഹം പറഞ്ഞു.
തെരഞ്ഞെടുപ്പിൽ വിജയിക്കാൻ സർജിക്കൽ സ്‌ട്രൈക്ക് എന്ന നാടകം അവതരിപ്പിച്ച രാഷ്ട്രീയ പാർട്ടിയാണ് ബി.ജെ.പി. അവർ എന്തും ചെയ്യുമെന്ന ഭയം ജനങ്ങളുടെയും പല രാഷ്ട്രീയ നേതാക്കളുടെയും മനസ്സിലുണ്ട്. 2019 ലെ പുൽവാമ ആക്രമണം യഥാർത്ഥത്തിൽ നടന്നതല്ലെന്നും അത് അരങ്ങേറിയതാണെന്നും മുൻ ജമ്മു കശ്മീർ ഗവർണർ സത്യപാൽ മാലിക് ആരോപിച്ചതുപോലെ ഗോധ്ര സംഭവത്തെക്കുറിച്ചും സമാനമായ കാര്യങ്ങൾ ഉന്നയിക്കുന്നുണ്ടെന്നും സഞ്ജയ് റാവത്ത് പറഞ്ഞു. .
2002 ഫെബ്രുവരിയിൽ ഹിന്ദു തീർഥാടകർ കൊല്ലപ്പെട്ട ഗോധ്ര ട്രെയിൻ കത്തിച്ചത് ഗുജറാത്ത് കലാപത്തിന് കാരണമായതും പുൽവാമ ഭീകരാക്രമണത്തിന്റെ പ്രതികാരമെന്ന നിലയിൽ 2019 ഫെബ്രുവരിയിൽ പാകിസ്ഥാനിലെ ബാലാകോട്ടിൽ തീവ്രവാദ പരിശീലന ക്യാമ്പിനെതിരെ ഇന്ത്യൻ യുദ്ധവിമാനങ്ങൾ നടത്തിയ വ്യോമാക്രമണവും പരാമർശിക്കുകയായിരുന്നു അദ്ദേഹം.
രാമക്ഷേത്രത്തിന്റെ ഉദ്ഘാടന വേളയിൽ ട്രെയിൻ മാർഗം നിരവധി പേർ അയോധ്യ സന്ദർശിക്കും. ആ സമയത്ത്, പ്രത്യേക പ്രദേശങ്ങളിൽ, ട്രെയിനുകൾക്ക് നേരെ കല്ലെറിയുമെന്നും അവർ ആക്രമിക്കപ്പെടുമെന്നും ഞങ്ങൾ ഭയപ്പെടുന്നു. അപ്പോൾ ബി.ജെ.പി കലാപത്തിനു പ്രേരിപ്പിക്കാം. ഇത് ജനങ്ങളുടെയും രാഷ്ട്രീയ പാർട്ടികളുടെയും മനസ്സിലുള്ള ആശങ്കയാണ്- റാവത്ത് പറഞ്ഞു.
