തിരുവനന്തപുരം-ചുരുങ്ങിയ കാലം കൊണ്ട് തന്നെ ഒരുപിടി ഹിറ്റ് സിനിമകളുടെ ഭാഗമാകാന്‍ കഴിഞ്ഞ നടിയാണ് കല്യാണി പ്രിയദര്‍ശന്‍. മലയാളത്തിലെ യുവനായികമാരില്‍ മുന്‍നിരയിലുള്ള നടിയാണ് കല്യാണി. പ്രിയദര്‍ശന്റെയും ലിസിയുടെയും മകളെന്ന മേല്‍വിലാസത്തിലാണ് എത്തിയതെങ്കിലും സിനിമാലോകത്തു വളരെപ്പെട്ടെന്നു തന്റേതായ ഒരിടം കണ്ടെത്താന്‍ കല്യാണിക്ക് സാധിച്ചു. ഇപ്പോഴിതാ വിവാഹ സങ്കല്‍പങ്ങള്‍ തുറന്നുപറഞ്ഞിരിക്കുകയാണ് കല്യാണി.
'അടുത്തിടെ എനിക്കു നാത്തൂനായി പ്രമോഷന്‍ ലഭിച്ചു. അനിയന്‍ ചന്തുവിന്റെ (സിദ്ധാര്‍ഥ്) വിവാഹം കഴിഞ്ഞു. ചന്തുവിന്റെ ഭാര്യ മെലാനി യുഎസ്സില്‍ നിന്നാണ്. കരിയറോ വിവാഹമോ എന്തുമാകട്ടെ, ഞങ്ങളുടെ തീരുമാനത്തെ 100 ശതമാനം പിന്തുണയ്ക്കുന്ന ബെസ്റ്റ് പേരന്റ്സ് ആണു ഞങ്ങളുടേത്. എങ്കിലും കല്യാണത്തെ കുറിച്ചൊന്നും ഞാനിപ്പോള്‍ ചിന്തിക്കുന്നേയില്ല. എങ്കിലും വിവാഹ സങ്കല്‍പം പറയാം.
'വരനെ ആവശ്യമുണ്ടി'ലെ ബിബീഷിന്റെ വ്യക്തിത്വവും, 'ഹൃദയ'ത്തിലെ അരുണിന്റെ നിഷ്‌കളങ്കതയും, 'ബ്രോ ഡാഡി'യിലെ ഈശോയുടെ ആത്മവിശ്വാസവും, 'തല്ലുമാല'യിലെ വസീമിന്റെ 'സ്വാഗും' ഒത്തിണങ്ങിയ ഒരാളാണ് എന്റെ മനസ്സില്‍. അങ്ങനെയുള്ള ആളെ കിട്ടുമോ, എങ്കില്‍ കെട്ടാന്‍ ദേ, റെഡി' കല്യാണി പറഞ്ഞു.ദുല്‍ഖര്‍ സല്‍മാന്‍ നായകനായ വരനെ ആവശ്യമുണ്ട് എന്ന ചിത്രത്തിലൂടെയാണ് കല്യാണി മലയാളത്തില്‍ വരവറിയിക്കുന്നത്. ആദ്യ ചിത്രത്തില്‍ തന്നെ മികച്ച പ്രകടനം കാഴ്ചവെയ്ക്കാന്‍ താരത്തിന് കഴിഞ്ഞു. പിന്നീട് ഇറങ്ങിയ മരക്കാര്‍, ബ്രോ ഡാഡി, ഹൃദയം, തല്ലുമാല തുടങ്ങിയ ചിത്രങ്ങള്‍ ശ്രദ്ധനേടുകയും പ്രേക്ഷക പ്രശംസ ഏറ്റുവാങ്ങുകയും ചെയ്തിരുന്നു. ശേഷം മൈക്കില്‍ ഫാത്തിമ ആണ് കല്യാണിയുടെ റിലീസിന് തയ്യാറെടുക്കുന്ന ചിത്രം.
