കൊച്ചി-രജനികാന്തിനെ നായകനാക്കി നെല്‍സണ്‍ ദിലീപ്കുമാര്‍ സംവിധാനം ചെയ്ത 'ജയിലര്‍' തിയറ്ററുകളിലെത്തിയിരിക്കുകയാണ്. വേള്‍ഡ് വൈഡായി 4000 സ്‌ക്രീനുകളിലാണ് ചിത്രം റിലീസ് ചെയ്തിരിക്കുന്നത്. ആദ്യ ഷോ പൂര്‍ത്തിയാകുമ്പോള്‍ എങ്ങുനിന്നും മികച്ച അഭിപ്രായമാണ് ചിത്രത്തിനു ലഭിച്ചുകൊണ്ടിരിക്കുന്നത്. സൂപ്പര്‍താരം മോഹന്‍ലാലും ജയിലറില്‍ ശ്രദ്ധേയമായ വേഷം അവതരിപ്പിച്ചിട്ടുണ്ട്. രജനികാന്തിനൊപ്പം മോഹന്‍ലാലും കസറിയെന്നാണ് ആരാധകര്‍ ഒന്നടങ്കം അഭിപ്രായപ്പെടുന്നത്.
അതിഥി വേഷത്തിലാണ് മോഹന്‍ലാല്‍ ജയിലറില്‍ എത്തിയിരിക്കുന്നത്. താരത്തിന്റെ ആകെ സ്‌ക്രീന്‍ ടൈം വെറും പത്ത് മിനിറ്റില്‍ താഴെയാണ്. എന്നാല്‍ ചുരുങ്ങിയ സമയം കൊണ്ട് തിയറ്ററുകളെ ഇളക്കിമറിക്കാന്‍ മോഹന്‍ലാലിന്റെ കഥാപാത്രത്തിനു സാധിച്ചു. ഗംഭീര സംഘട്ടന രംഗങ്ങള്‍ അടക്കം മാസ് സീനുകളാണ് മോഹന്‍ലാലിന് ചിത്രത്തിലുള്ളത്. രജനികാന്തിന്റെ സഹായിയാണ് മോഹന്‍ലാലിന്റെ മാത്യു എന്ന കഥാപാത്രം. രജനിക്കൊപ്പമുള്ള മോഹന്‍ലാലിന്റെ സീനിന് വലിയ കയ്യടിയാണ് തിയറ്ററില്‍ ലഭിച്ചത്. ഒരു റിവഞ്ച് ത്രില്ലറായാണ് ചിത്രം ഒരുക്കിയിരിക്കുന്നത്. തമാശയും ആക്ഷനും മാസും ചേര്‍ന്ന കിടിലന്‍ ചിത്രമെന്നാണ് ആദ്യ ഷോയ്ക്ക് ശേഷമുള്ള ആരാധകരുടെ പ്രതികരണം.
വേള്‍ഡ് വൈഡായി 4000 സ്‌ക്രീനുകളിലാണ് ചിത്രം ആദ്യ ദിനം പ്രദര്‍ശിപ്പിക്കുക. ചെന്നൈയിലും ബെംഗളൂരിലും ജയിലര്‍ റിലീസ് പ്രമാണിച്ച് പല സ്വകാര്യ സ്ഥാപനങ്ങളും ജീവനക്കാര്‍ക്ക് അവധി നല്‍കി. . ആദ്യ ഷോയ്ക്ക് പിന്നാലെ ചെന്നൈയിലും കേരളത്തിലും രജനി ആരാധകര്‍ ആഘോഷ പ്രകടനങ്ങള്‍ ആരംഭിച്ചു. രണ്ട് വര്‍ഷത്തിനു ശേഷമാണ് ഒരു രജനി ചിത്രം തിയറ്ററുകളിലേക്ക് എത്തുന്നത്. മുത്തുവേല്‍ പാണ്ഡ്യന്‍ എന്ന കഥാപാത്രത്തെയാണ് രജനി ചിത്രത്തില്‍ അവതരിപ്പിച്ചിരിക്കുന്നത്. കേരളത്തില്‍ അതിര്‍ത്തി നഗരമായ പാലക്കാട്ട് വിവിധ തിയേറ്ററുകളിലെ നിരവധി സ്‌ക്രീനുകളില്‍ ജയിലറാണ് പ്രദര്‍ശിപ്പിക്കുന്നത്.
