ഹൈദരാബാദ്-അടുത്തിടെയായി പുറത്തിറങ്ങിയ ചിരഞ്ജീവി ചിത്രങ്ങള്‍ എല്ലാം ബോക്സോഫീസില്‍ പരാജയമായിരുന്നു . അതിനാല്‍ പുതിയ ചിത്രം 'ഭോലാ ശങ്കര്‍' ആരാധകര്‍ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് . ചിത്രത്തിന്റെ ട്രെയ്ലര്‍ കഴിഞ്ഞ ദിവസമാണ് പുറത്തുവന്നത്. അജിത്ത് ചിത്രം 'വേതാള'ത്തിന്റെ റീമേക്ക് ആണ് ഭോല ശങ്കര്‍.ചിത്രത്തില്‍ ചിരഞ്ജീവി വാങ്ങിയ പ്രതിഫലത്തെ കുറിച്ചുള്ള ചര്‍ച്ചകളാണ് ഇപ്പോള്‍ നടക്കുന്നത്. ചിത്രത്തില്‍ പ്രതിഫലം വാങ്ങിക്കാതെയാണ് താരം എത്തുന്നത് എന്നാണ് പുതിയ റിപ്പോര്‍ട്ട്. ചിത്രം ലാഭമായെങ്കില്‍ മാത്രം ഒരു ഓഹരി താരം സ്വീകരിക്കും. മെഹര്‍ രമേഷാണ് ചിത്രത്തിന്റെ സംവിധാനം.
രമബ്രഹ്മം സുങ്കരയാണ് ചിത്രം നിര്‍മ്മിക്കുന്നത്. കീര്‍ത്തി സുരേഷ് ചിത്രത്തില്‍ ചിരഞ്ജീവിയുടെ സഹോദരിയുടെ വേഷത്തില്‍ എത്തുമ്പോള്‍ നായികയാകുന്നത് തമന്നയാണ്. ഡൂഡ്ലി ആണ് ചിരഞ്ജീവി ചിത്രത്തിന്റെ ഛായാഗ്രാഹണം നിര്‍വ്വഹിക്കുന്നത്. മാര്‍ത്താണ്ഡ് കെ വെങ്കടേഷ് ആണ് എഡിറ്റിംഗ്.
ചിരഞ്ജീവി നായകനാകുന്ന ചിത്രത്തിന്റെ കലാസംവിധായകന്‍ എ.എസ് പ്രകാശ് ആണ്. അജിത്ത് നായകനായ ചിത്രം 'ബില്ല' തെലുങ്കിലേക്ക് റീമേക്ക് ചെയ്ത സംവിധായകനാണ് മെഹര്‍ രമേഷ്. പ്രഭാസ് ആയിരുന്നു ചിത്രത്തില്‍ നായകന്‍. ചിരഞ്ജീവി നായകനായി ഏറ്റവും ഒടുവിലെത്തിയ ചിത്രം 'വാള്‍ട്ടര്‍ വീരയ്യ' ആയിരുന്നു. നന്ദമൂരി ബാലകൃഷ്ണയുടെ 'വീരസിംഹ റെഡ്ഡി'ക്കൊപ്പം തിയേറ്ററില്‍ എത്തിയ ചിത്രം രക്ഷപ്പെട്ടില്ല. ഇതിന് മുമ്പ് എത്തിയ 'ആചാര്യ' വലിയ പരാജയമായിരുന്നു.
