ന്യൂദൽഹി - കോൺഗ്രസ് നേതാവ് രാഹുൽ ഗാന്ധിക്ക് രണ്ട് വർഷം തടവ് ശിക്ഷ വിധിച്ച സൂറത്ത് കോടതി വിധിക്കെതിരെയുള്ള അപ്പീൽ, നിയമ പോരാട്ടത്തിന് കോൺഗ്രസ് അഞ്ചംഗ സമിതിയെ ചുമതലപ്പെടുത്തി.
മനു അഭിഷേക് സിംഗ് വി, പി ചിദംബരം, സൽമാൻ ഖുർഷിദ്, വിവേക് തൻഖ, രാഹുലിന്റെ അഭിഭാഷകൻ ആർ.എസ് ചീമ എന്നിവരാണ് വിദഗ്ധ സമിതിയിലുള്ളത്.
രാജ്യത്ത് എതിർ ശബ്ദങ്ങളെ നിശബ്ദമാക്കാൻ ശ്രമം നടക്കുകയാണെന്ന് എ.ഐ.സി.സി ജനറൽ സെക്രട്ടറി കെ.സി വേണുഗോപാൽ പറഞ്ഞു. പ്രതിപക്ഷ നേതാക്കളെ കേസിൽ കുടുക്കുകയാണെന്നും രാഹുൽ ഗാന്ധിക്കെതിരെ കള്ളപ്രചാരണമാണ് നടക്കുന്നതെന്നും അദ്ദേഹം വ്യക്തമാക്കി.
അഭിമന്യുവിനെ പത്മവ്യൂഹത്തിൽ കുടുക്കിയത് പോലെ രാഹുൽ ഗാന്ധിയെ കേസുകൾ കൊണ്ട് വളയുന്നുവെന്ന് പറഞ്ഞ വേണുഗോപാൽ ഇതിനെതിരെ നിയമപരമായ നടപടികളുമായി മുന്നോട്ട് പോകുമെന്നും പ്രതികരിച്ചു. ഭയന്നോടുന്നതല്ല കോൺഗ്രസിന്റെ പാരമ്പര്യം. രാഹുൽ ഗാന്ധിയെ ഗൂഢ പദ്ധതികളിലൂടെ ജയിലിൽ അടപ്പിക്കാനുള്ള ശ്രമമാണ് ബി.ജെ.പി നടത്തുന്നത്. മോദിയുടെ തെറ്റുകൾക്കെതിരെ പ്രതികരിക്കുന്നവരെ അന്വേഷണ ഏജൻസികളെ ഉപയോഗിച്ച് നിശബ്ദരാക്കാനാണ് ശ്രമം. ഭാരത് ജോഡോ യാത്ര ബി.ജെ.പിക്ക് വെല്ലുവിളിയായി. അതോടെയാണ് രാഹുലിനെ കുരുക്കാനുള്ള ശ്രമം തുടങ്ങിയതെന്നും കെ.സി വേണുഗോപാൽ മാധ്യമങ്ങളോട് പറഞ്ഞു.
