Sorry, you need to enable JavaScript to visit this website.

മദ്യപിക്കാന്‍ പണം നല്‍കാത്തതിന് വീട്ടില്‍ കയറി വിരലൊടിച്ചു, മൂന്നു പേര്‍ റിമാന്‍ഡില്‍

പാലക്കാട്-മദ്യപിക്കാന്‍ പണം നല്‍കാത്തതിന് യുവാവിനെ വളഞ്ഞിട്ട് മര്‍ദ്ദിച്ച സംഭവത്തില്‍ മൂന്ന് പേര്‍ പിടിയില്‍. ചിറക്കാട് സ്വദേശികളായ ബൈജു തങ്കരാജ്, ഷെറിന്‍, കുന്നത്തൂര്‍മേട് സ്വദേശി അരുണ്‍ എന്നിവരെ ടൗണ്‍ സൗത്ത് പൊലീസാണ് പിടികൂടിയത്. കുന്നത്തൂര്‍മേട് സ്വദേശി അനൂപിനാണ് മര്‍ദ്ദനത്തില്‍ പരിക്കേറ്റത്.

ജനുവരി 31ന് രാത്രി ഒമ്പതരയോടെയാണ് സംഭവം. അനൂപിനെ കുന്നത്തൂര്‍മേട് വായനശാലയ്ക്ക് സമീപം തടഞ്ഞു നിര്‍ത്തി മദ്യപിക്കാന്‍ പണം ആവശ്യപ്പെട്ടു. നല്‍കാതെ പോയ അനൂപിനെ വീട്ടില്‍ക്കയറി കത്തി, ഇരുമ്പ് പൈപ്പ് എന്നിവ ഉപയോഗിച്ച് മര്‍ദിക്കുകയായിരുന്നു. മര്‍ദ്ദനത്തില്‍ അനൂപിന്റെ കൈവിരല്‍ ഒടിഞ്ഞു.

ഇരുമ്പ് പൈപ്പ് ഉപയോഗിച്ചുള്ള മര്‍ദ്ദനത്തിലാണ് മോതിര വിരല്‍ ഒടിഞ്ഞത്. അനൂപിന്റെ അനുജനും നിസാര പരിക്കേറ്റു. ബൈജുവിനെതിരെ കഞ്ചാവ്, പിടിച്ചുപറി തുടങ്ങി 12 ഓളം കേസുകള്‍ നിലവിലുണ്ടെന്ന് പോലീസ് പറഞ്ഞു. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.

 

Latest News