തൃശൂര്‍- ഈ മാസം 20ന് തിയേറ്ററുകളിലേക്കെത്താന്‍ തയാറെടുക്കുന്ന ആയിഷയിലെ ക്യാരക്ടര്‍ പോസ്റ്റര്‍ പുറത്തുവിട്ടു. ലത്തീഫ എന്ന തുണീഷ്യന്‍-അറബ് താരത്തിന്റെ ക്യാരക്ടര്‍ പോസ്റ്ററാണ് പുറത്തുവിട്ടത്. സാറ എന്ന കഥാപാത്രത്തെയാണ് താരം ചിത്രത്തില്‍ അവതരിപ്പിക്കുന്നത്. ഒഡീഷനില്‍ പ്രകടനം കൊണ്ട് തങ്ങളെ അമ്പരപ്പിച്ച പെര്‍ഫോമറാണ് ലത്തീഫ എന്നാണ് പോസ്റ്റര്‍ പങ്കുവെച്ച് കൊണ്ട് മഞ്ജു വാര്യര്‍ സേ്ബുക്കില്‍ കുറിച്ചത്.
മഞ്ജു വാര്യരാണ് ടൈറ്റില്‍ റോളിലെത്തുന്നത്. മലയാളത്തിന് പുറമെ ആറ് ഭാഷകളിലാണ് ചിത്രം റിലീസ് ചെയ്യുന്നത്. ആയിഷയുടെ ട്രെയിലര്‍ ഏറെ ശ്രദ്ധ നേടിയിരുന്നു. ഗള്‍ഫ് മേഖലയില്‍ വീട്ടുജോലിക്കായി എത്തുന്ന ഒരു സ്ത്രീയുടെ കഥയാണ് ആയിഷ പറയുന്നത് എന്ന് തോന്നിപ്പിക്കുംവിധമാണ് ചിത്രത്തിന്റെ ട്രെയിലര്‍ ഒരിക്കിയിരിക്കുന്നത്.
നവാഗതനായ ആമിര്‍ പള്ളിക്കല്‍ സംവിധാനം ചെയ്യുന്ന ചിത്രമാണ് ആയിഷ. ചിത്രത്തിന് ക്ലീന്‍ യു സര്‍ട്ടിഫിക്കറ്റാണ് ലഭിച്ചത്. വര്‍ഷങ്ങള്‍ക്ക് ശേഷം തമിഴ് താരം പ്രഭുദേവ മലയാളത്തില്‍ ഡാന്‍സ് കൊറിയോഗ്രാഫി നിര്‍വ്വഹിക്കുന്നു എന്ന പ്രത്യേകതയും ആയിഷയ്ക്കുണ്ട്. മഞ്ജു വാര്യര്‍ക്ക് പുറമേ ക്ലാസ്‌മേറ്റ് എന്ന ചിത്രത്തിലൂടെ പ്രേക്ഷകപ്രീതി നേടിയ രാധിക ഒരിടവേളയ്ക്ക് ശേഷം സിനിമയിലേക്ക് തിരിച്ചെത്തുന്നു.
വിജയ് ദേവരകൊണ്ട ചിത്രമായ ലൈഗറിന് ശേഷം വിഷ്ണുശര്‍മ്മ ഛായാഗ്രഹണം നിര്‍വഹിക്കുന്ന മലയാള ചിത്രമാണ് 'ആയിഷ'. ആഷിഫ് കക്കോടിയുടേതാണ് രചന. ക്രോസ് ബോര്‍ഡര്‍ സിനിമയുടെ ബാനറില്‍ സംവിധായകന്‍ സക്കറിയയാണ് ആയിഷ നിര്‍മ്മിക്കുന്നത്. ഫെദര്‍ ടച്ച് മൂവി ബോക്സ്, ഇമാജിന്‍ സിനിമാസ്, ലാസ്റ്റ് എക്സിറ്റ് സിനിമാസ്,മൂവീ ബക്കറ്റ് എന്നീ ബാനറുകളില്‍ ശംസുദ്ധീന്‍ മങ്കരത്തൊടി, സക്കറിയ വാവാട്, ഹാരിസ് ദേശം, അനീഷ് പി ബി, ബിനീഷ് ചന്ദ്രന്‍ എന്നിവരാണ് ഈ ചിത്രത്തിന്റെ സഹ നിര്‍മ്മാതാക്കള്‍.
എഡിറ്റിംഗ് അപ്പു എന്‍ ഭട്ടതിരി, കലാസംവിധാനം മോഹന്‍ദാസ്, വസ്ത്രാലങ്കാരം സമീറ സനീഷ്, ചമയം റോണക്സ് സേവ്യര്‍, ചീഫ് അസ്സോസിയേറ്റ് ഡയറക്ടര്‍ ബിനു ജി നായര്‍, ശബ്ദ സംവിധാനം വൈശാഖ്, പ്രൊമോഷന്‍ കണ്‍സള്‍ട്ടന്റ് - വിപിന്‍ കുമാര്‍, സ്റ്റില്‍സ് രോഹിത് കെ സുരേഷ്, ലൈന്‍ പ്രൊഡ്യൂസര്‍ റഹിം പി എം കെ.
