ബംഗളുരു- കർണാടക നിയമസഭാ തെരഞ്ഞെടുപ്പിനു ഒരാഴ്ച മാത്രം ബാക്കി നിൽക്കെ കോൺഗ്രസിനെതിരെ രൂക്ഷ പരിഹാസവുമായി പ്രധാനമന്ത്രി നരേന്ദ്ര മോഡിയുടെ പ്രചാരണം. വോട്ടെടുപ്പു ഫലം വന്നാൽ കോൺഗ്രസ് പഞ്ചാബ്, പുതുച്ചേരി പരിവാർ അതായത് 'പി പി പി' ആയി ഒതുങ്ങുമെന്ന് മോഡി പരിഹസിച്ചു. തുംകുരുവിൽ തെരഞ്ഞെടുപ്പു റാലിയിൽ പ്രസംഗിക്കുകയായിരുന്നു മോഡി.
ദാരിദ്യവും കർഷകരുടെ ആത്മഹത്യയും കോൺഗ്രസിന്റെ ഭരണം മൂലമാണെന്ന് നേരത്തെ ബംഗളുരുവിൽ മറ്റൊരു റാലിയിൽ പ്രസംഗിച്ച മോഡി കോൺഗ്രസ് ജെഡിഎസുമായി സഖ്യമുണ്ടാക്കാനുള്ള ശ്രമത്തിലാണെന്നും ആരോപിച്ചു. കോൺഗ്രസ് താമസിയാതെ ഒരു പ്രാദേശിക പാർട്ടിയായി മാറുമെന്നും അദ്ദേഹം പറഞ്ഞു. ശനിയാഴ്ച അഞ്ചോളം റാലികളിലാണ് മോഡി പ്രസംഗിക്കുന്നത്. ബിജെപി അധ്യക്ഷൻ അമിത് ഷായും റോഡ് ഷോയുമായി കർണാടകയിലുണ്ട്.
