ഇസ്ലാമാബാദ്- തന്നെ പുറത്താക്കാനുള്ള പ്രതിപക്ഷത്തിന്റെ ശ്രമങ്ങൾ വിജയിച്ചാൽ അംഗീകരിക്കില്ലെന്ന് പാക് പ്രധാനമന്ത്രി ഇംറാൻ ഖാൻ. നാളെ(ശനിയാഴ്ച)പാർലമെന്റിൽ വിശ്വാസ വോട്ടെടുപ്പ് നടക്കാനിരിക്കെയാണ് ഇംറാൻ ഖാന്റെ പ്രസ്താവന. ഇന്ന് രാത്രി രാജ്യത്തോട് നടത്തിയ ടെലിവിഷൻ പ്രസംഗത്തിലാണ് ഇംറാൻ ഇക്കാര്യം പറഞ്ഞത്. പാർലമെന്റ് പിരിച്ചുവിട്ട സ്പീക്കറുടെ നടപടി പിൻവലിച്ച് വിശ്വാസ വോട്ടെടുപ്പ് നടത്താൻ പാക് സുപ്രീം കോടതി ആവശ്യപ്പെട്ടിരുന്നു. ഇതിന്റെ അടിസ്ഥാനത്തിൽ നാളെയാണ് വിശ്വാസവോട്ടെടുപ്പ് നടക്കുക. മുഖ്യസഖ്യകക്ഷി പിന്തുണ പിൻവലിച്ചതോടെയാണ് ഇംറാൻ ഖാന് ഭൂരിപക്ഷം നഷ്ടമായത്.
ഇറക്കുമതി ചെയ്ത ഒരു സർക്കാറിനെ അംഗീകരിക്കില്ലെന്ന് ഇംറാൻ ആവർത്തിച്ചു. വിദേശ ഗൂഢാലോചനയുടെ ഭാഗമായാണ് തന്നെ അധികാരത്തിൽനിന്ന് പുറത്താക്കുന്നത്. പോരാടാൻ താൻ ഒരുക്കമാണ്. ഞായറാഴ്ച പൊതുജനങ്ങളോട് തെരുവിലിറങ്ങാനും സമാധാനപരമായി പ്രതിഷേധിക്കാനും ഇംറാൻ ആഹ്വാനം ചെയ്തു.
നാളെ വോട്ടെടുപ്പ് നടന്നാൽ ഇംറാൻ ഖാന്റെ നേതൃത്വത്തിലുള്ള ഭരണകക്ഷി പരാജയപ്പെടുമെന്നാണ് വിലയിരുത്തൽ. പാക്കിസ്ഥാൻ രൂപീകൃതമായ ശേഷം ഒരു സർക്കാറിനും കാലാവധി പൂർത്തിയാക്കാൻ കഴിഞ്ഞിട്ടില്ല. ഇംറാൻ ഖാന്റെ സർക്കാറിനെയും കാത്തിരിക്കുന്നത് ഇതേ അവസ്ഥയാണ് എന്നാണ് പാക് മാധ്യമങ്ങൾ റിപ്പോർട്ട് ചെയ്യുന്നത്.
