നാഗ്പുര്‍- ഇന്ത്യയില്‍ ഏറ്റവും കൂടുതല്‍ ഭൂപ്രദേശത്ത് സാന്നിധ്യമുള്ള ഓള്‍ ഇന്ത്യ റേഡിയോയുടെ റെക്കോര്‍ഡ് തകര്‍ത്തതായി ആര്‍എസ്എസ്. രാജ്യത്ത് ഓള്‍ ഇന്ത്യ റേഡിയോയുടെ സാന്നിധ്യം 92% ഭൂവിസ്തൃതിയിലാണെങ്കില്‍ 95% ഭൂപ്രദേശത്തും സംഘടനയുടെ സാന്നിധ്യമുണ്ടെന്നാണ് ആര്‍എസ്എസ് അവകാശപ്പെടുന്നത്.
നാഗ്പുരിലെ ആര്‍എസ്എസ് ആസ്ഥാനത്തു നടക്കുന്ന അഖില ഭാരതീയ പ്രതിനിധി സഭയിലാണ് ഈ താരതമ്യം. രാജ്യത്ത് ആര്‍എസ്എസിന് 58,976 ശാഖകളുണ്ടെന്ന് റിപ്പോര്‍ട്ടില്‍ പറയുന്നു. 2017 മാര്‍ച്ചില്‍ ഉണ്ടായിരുന്ന 57,165 ശാഖകളാണ് ഒരു വര്‍ഷം പിന്നിടുമ്പോള്‍ 58,976 ആയി വര്‍ധിച്ചത്.
ഇന്ത്യയുടെ ഭൂപ്രദേശത്തിന്റെ 95% പ്രദേശത്തും തങ്ങളുടെ സാന്നിധ്യമുണ്ടെന്ന് ആര്‍എസ്എസ് ജോയിന്റ് ജനറല്‍ സെക്രട്ടറി കൃഷ്ണ ഗോപാല്‍ വ്യക്തമാക്കി. നാഗാലാന്‍ഡ്, മിസോറം എന്നീ സംസ്ഥാനങ്ങളിലെ ചില ഉള്‍പ്രദേശങ്ങളിലും കശ്മീര്‍ താഴ്വരയിലും മാത്രമാണ് ആര്‍എസ്എസിന്റെ സാന്നിധ്യമില്ലാത്തതെന്നും അദ്ദേഹം പറഞ്ഞു.
