ചെന്നൈ- ആരാധകര്‍ക്ക് പിറന്നാള്‍ സമ്മാനമായി ഇളയ ദളപതി വിജയിന്റെ പുതിയ സിനിമാ പ്രഖ്യാപനം. നാല്‍പ്പത്തിയേഴാം വയസിലേക്ക് പ്രവേശിച്ച വിജയ് ഇന്നലെ വൈകിട്ടാണ് സോഷ്യല്‍ മീഡിയയിലൂടെ പുതിയ സിനിമയായ ബീസ്റ്റിന്റെ അനൗണ്‍സ്‌മെന്റ് നടത്തിയത്.
കൊലമാവ് കോകില, ഡോക്ടര്‍ തുടങ്ങിയ ചിത്രങ്ങള്‍ സംവിധാനം ചെയ്ത നെല്‍സണാണ് സംവിധായകന്‍. സണ്‍ പിക്‌ച്ചേഴ്‌സിന്റെ ബാനറില്‍ കലാനിധി മാരനാണ് ചിത്രം നിര്‍മ്മിക്കുന്നത്.
വിജയുടെ 65 ാമത്തെ ചിത്രമാണിത്. തെലുങ്കിലെ താരറാണി പൂജാ ഹെഗ്‌ഡെയാണ് ബീസ്റ്റിലെ നായിക. അനിരുദ്ധ് രവിചന്ദറാണ് സംഗീതസംവിധാനം. കമല്‍ഹാസന്റെ ലോകേഷ് കനകരാജ് ചിത്രം വിക്രത്തിന്റെ സംഘട്ടന രംഗങ്ങള്‍ ചിത്രീകരിക്കുന്ന ഇരട്ട സഹോദരങ്ങളായ അന്‍പ് അറിവാണ് ബീസ്റ്റില്‍ സംഘട്ടനം നിര്‍വഹിക്കുക.
നായകന്‍, കലക്ടര്‍, വില്ലന്‍ എന്നീ ചിത്രങ്ങള്‍ക്ക് ഛായാഗ്രഹണം നിര്‍വഹിച്ച മനോജ് പരമഹംസയാണ് ഈ സിനിമയുടെ ഛായാഗ്രഹണം നിര്‍വഹിക്കുന്നത്.
പിറന്നാള്‍ ദിനത്തില്‍ വ്യത്യസ്തമായ ആഘോഷ പരിപാടികളാണ് ആരാധകര്‍ തമിഴ്‌നാട്ടിലെമ്പാടും ഒരുക്കിയിരിക്കുന്നത്. വാട്സാപ്പ് ഡിസ ്പ്‌ളേ പിക്ചറായി ഉപയോഗിക്കാന്‍ തയാറാക്കിയ ചിത്രം ഇതിനോടകം വൈറലാണ്. വിജയ് ഇതുവരെ അവതരിപ്പിച്ച ഹിറ്റ് കഥാപാത്രങ്ങളെ എല്ലാം ഉള്‍പ്പെടുത്തി തയാറാക്കിയതാണ് ചിത്രം. ഡിപിയില്‍ ഒട്ടേറെ ചെറിയ വിശദാംശങ്ങള്‍ പോലും ഉള്‍പ്പെടുത്തിയിട്ടുണ്ട്. കോവിഡ് നിയന്ത്രണങ്ങളെത്തുടന്ന് പിറന്നാള്‍ ആഘോഷം ട്വിറ്റര്‍ സ്‌പേസ് പ്‌ളാറ്റ്‌ഫോമിലാകുമെന്നാണ് വിവരം.
