തിരുവനന്തപുരം- ബി.ജെ.പിയുടെ സൈബര്‍ ആക്രമണം നേരിട്ട നടന്‍ സിദ്ധാര്‍ഥിന് പിന്തുണയുമായി ശശി തരൂര്‍ എംപി. സമൂഹത്തിലുള്ള വില്ലന്മാര് സിനിമയിലുള്ളവരേക്കാള്‍ ഭീകരന്മാരാണെന്നും അവരെ നേരിടാന്‍ സിദ്ധാര്‍ഥിനെ പോലെയുള്ളവര്‍ക്ക് മാത്രമേ കഴിയൂ എന്നുമാണ് ശശി തരൂര്‍ കുറിച്ചത്. ഇന്നലെയാണ് തന്റെ ഫോണ്‍നമ്പര്‍ തമിഴ്‌നാട് ബിജെപി പുറത്തുവിട്ടുവെന്നും 500ലേറെ ഭീഷണി സന്ദേശങ്ങള്‍ വന്നുവെന്നും താരം വ്യക്തമാക്കിയത്. എന്തുകൊണ്ടാണ് സിനിമയില്‍ കാണുന്ന നായകന്‍മാര്‍ തീവ്രമായ പ്രൊപ്പഗാണ്ടകള്‍ക്കെതിരെ ശബ്ദമുയര്‍ത്താത്തതെന്ന് നമ്മള്‍ ചിന്തിക്കാറുണ്ട്. നമ്മുടെ സമൂഹത്തിലുള്ള വില്ലന്മാര് സിനിമയില്‍ ഉള്ളവരെക്കാള്‍ ഭയാനകമാണ്. അത് ഈ നായകന്‍മാര്‍ക്ക് താങ്ങാനാവില്ല എന്നതാണ് കാരണം. വളരെ വിരളമായി സിദ്ധാര്‍ഥിനെ പോലുള്ളവര്‍ക്കെ അതിന് കഴിയൂ- ശശി തരൂര്‍ ട്വീറ്റ് ചെയ്ന്നു.
കോവിഡ് വ്യാപനം രൂക്ഷമായതോടെകേന്ദ്ര സര്‍ക്കാരിന്റെ പ്രവര്‍ത്തനങ്ങളെ രൂക്ഷമായി വിമര്‍ശിച്ച് സിദ്ധാര്‍ഥ് രംഗത്തെത്തിയിരുന്നു. മോഡിയുടെ പഴയ ട്വീറ്റുകളും കുത്തിപ്പൊക്കിയായിരുന്നു വിമര്‍ശനം. അതിന് പിന്നാലെയാണ് താരത്തിന് നേരെ സൈബര്‍ ആക്രമണമുണ്ടായത്.
