പാട്ടുകാരനായും സംഗീത സംവിധായകനായും സംഗീതസപര്യയുടെ കാൽ നൂറ്റാണ്ടു പിന്നിട്ടിരിക്കുകയാണ് മലയാളികൾക്കു പ്രിയങ്കരനായ എം. ജയചന്ദ്രൻ എന്ന സംഗീതജ്ഞൻ. ജി. ദേവരാജൻ മാസ്റ്ററുടെയും എം.ബി. ശ്രീനിവാസന്റെയുമെല്ലാം വത്സലശിഷ്യനായ ഈ തിരുവനന്തപുരത്തുകാരൻ സാധനയിലും ജ്ഞാനത്തിലും സമർപ്പണത്തിലുമെല്ലാം പാരമ്പര്യത്തിന്റെ കണ്ണി മുറിയാതെ കാത്തുസൂക്ഷിക്കുന്നു. ഗുരുത്വത്തിന്റെ തണൽദൂരങ്ങളാണ് തന്റെ സംഗീതയാത്രയുടെ പിൻബലമെന്ന വിശ്വാസക്കാരനാണ് ഈ സംഗീത സംവിധായകൻ.
അഞ്ചാം വയസ്സിൽ തുടങ്ങിയ സംഗീതപഠനം. മുല്ലക്കര ഹരിഹര അയ്യർ, പെരുമ്പാവൂർ ജി. രവീന്ദ്രനാഥ്, നെയ്യാറ്റിൻകര മോഹനചന്ദ്രൻ എന്നിവരിൽനിന്നാണ് ശാസ്ത്രീയസംഗീതം അഭ്യസിച്ചത്. തുടർന്ന് സണ്ണി വത്സലത്തിനു കീഴിൽ പാശ്ചാത്യ സംഗീതവും അഭ്യസിച്ചു. സ്‌കൂൾ, കോളേജ് പഠനകാലത്ത് ഗായകനെന്ന നിലയിൽ പേരെടുത്ത ജയചന്ദ്രൻ മൂന്നു വർഷം കേരള യൂണിവേഴ്‌സിറ്റി കലോത്സവത്തിൽ മികച്ച ഗായകനായി. വസുധ എന്ന ചിത്രത്തിൽ ഗായകനായി സിനിമയിൽ അരങ്ങേറ്റം കുറിച്ചെങ്കിലും അതിനിടയിൽ തന്നെ ഒട്ടേറെ ആൽബങ്ങൾക്ക് സംഗീതസംവിധാനവും നിർവഹിച്ചിരുന്നു. ജി. ദേവരാജൻ മാസ്റ്ററുടെ സംഗീത സംവിധാന സഹായിയായി തുടങ്ങിയ ജയചന്ദ്രൻ സ്വതന്ത്ര സംഗീത സംവിധായകനാകുന്നത് ചന്ത എന്ന ചിത്രത്തിലൂടെയാണ്.
ഗായകനായും സംഗീത സംവിധായകനായുമുള്ള കാൽ നൂറ്റാണ്ടുകാലത്തെ കലാസപര്യയ്ക്കിടയിൽ മികച്ച സംഗീതസംവിധായകനുള്ള സംസ്ഥാന പുരസ്‌കാരം ഏഴു വർഷം ഇദ്ദേഹത്തിന് സ്വന്തമായിരുന്നു. 2005 ൽ മികച്ച ഗായകനുമായി. നോട്ടം എന്ന ചിത്രത്തിലെ 'മെല്ലെ... മെല്ലെ...' എന്ന ഗാനത്തിലൂടെയായിരുന്നു ആ അംഗീകാരം. 2015 ൽ എന്നു നിന്റെ മൊയ്തീൻ എന്ന ചിത്രത്തിലൂടെ മികച്ച സംഗീത സംവിധായകനുള്ള ദേശീയ പുരസ്‌കാരത്തിനും അർഹനായി.
തനിമയാർന്ന സംഗീതത്തിന്റെ തുടർച്ചയാണ് എം. ജയചന്ദ്രനിൽ കാണുന്നതെന്ന് എം.കെ. അർജുനൻ മാസ്റ്റർ വിശേഷിപ്പിച്ച ഈ കലാകാരൻ ഇതിനകം ആയിരത്തിലധികം ഗാനങ്ങൾക്ക് സംഗീതം പകർന്നുകഴിഞ്ഞു. ഒടുവിലായി സൂഫിയും സുജാതയും എന്ന ചിത്രത്തിലെ 'വാതുക്കല് വെള്ളരിപ്രാവ്...' എന്ന ഗാനം സ്വച്ഛസംഗീതത്തിന്റെ സാന്നിധ്യമാണ് നമ്മിൽ അനുഭവിപ്പിക്കുന്നത്. സംഗീതാത്മകമായ ഈ പ്രണയചിത്രത്തിലൂടെ ആയിരക്കണക്കിന് ഖൽബുകളിലേയ്ക്കാണ് അദ്ദേഹം കൂടുതുറന്നു പുറത്തുവിട്ട വെള്ളരിപ്രാവ് ചിറകടിച്ചെത്തിയത്. ആ ഈണത്തിനും ഈരടികൾക്കും എന്തോ ഒരു മാന്ത്രികതയുണ്ടെന്ന് ഏവരും സമ്മതിക്കുന്നു.
ആ പാട്ടിനെക്കുറിച്ച് അദ്ദേഹം പറയുന്നതിങ്ങനെ: 'ഇത്രയും വർഷത്തെ സംഗീത ജീവിതത്തിനിടയിൽ ഈശ്വരൻ നൽകിയ സമ്മാനമാണ് സൂഫിയും സുജാതയും എന്ന ചിത്രത്തിലെ ഗാനം. ഈ പാട്ടിന് ഈണമൊരുക്കുമ്പോൾ അത് ഇത്രത്തോളം സ്വീകരിക്കപ്പെടുമെന്ന് കരുതിയിരുന്നില്ല. ഇത്രയും കവർ വേർഷനുകൾ ഉണ്ടായിട്ടുള്ള ഗാനം വേറെയുണ്ടാകുമെന്നു തോന്നുന്നില്ല.'
സുജാതയ്ക്ക് സൂഫിയോടും സൂഫിക്ക് സുജാതയോടുമുള്ളത് ശാരീരികമായ അഭിലാഷമോ പ്രണയമോ അല്ല. തികച്ചും ആത്മീയമാണത്. സൂഫി ആ രീതിയിലാണ് സുജാതയെ സമീപിക്കുന്നത്. സുജാതയാകട്ടെ ഒന്നും പറയാനാകാതെ വീർപ്പുമുട്ടി നിൽക്കുകയാണ്. ഓരോ നോട്ടത്തിലൂടെയുമാണ് അവൾ പ്രണയം പറയുന്നത്. സുജാതയുടെ ജീവിതത്തിന്റെ വാതിലിൽ ഒരു വെള്ളരിപ്രാവ് മുട്ടുന്നു എന്നു തുടങ്ങിയാലോ എന്ന് ഹരിനാരായണൻ ചോദിച്ചപ്പോൾ മനോഹരമായിത്തോന്നി. വളരെ മനോഹരമായാണ് ഹരി ഓരോ വരിയും എഴുതിയത്. സൂഫി സംഗീതം ഖവാലിയുമായി ബന്ധപ്പെട്ടുകിടക്കുന്നതാണ്. സൂഫി എല്ലാത്തിലും ഈശ്വരനെ കാണുകയും സ്വയം മറന്ന് ഈശ്വരനിലേയ്ക്ക് ലയിക്കുകയുമാണ്. അതിനുയോജ്യമായ രീതിയിലാണ് പാട്ടിന് ഈണമൊരുക്കിയത്. വളരെ ലളിതമായ ഈണത്തിൽ ആ പാട്ട് വായുവിൽ അപ്പൂപ്പൻതാടി പോലെ പാറിപ്പറന്നു നടക്കുകയാണ്. പാട്ടു പാടാനായി ഇതുവരെ കേൾക്കാത്ത ശബ്ദത്തിനുവേണ്ടിയുള്ള യാത്ര അവസാനിച്ചത് നിത്യ മാമ്മനിലാണ്. പുരുഷശബ്ദമായി അർജുൻ കൃഷ്ണനും. എല്ലാവരും ഒത്തൊരുമിച്ചപ്പോൾ നല്ലൊരു പാട്ട് ജനിക്കുകയായിരുന്നു.'
'കോവിഡ് കാലം സമസ്ത മേഖലകളെയും സ്തംഭിപ്പിച്ച കൂട്ടത്തിൽ സിനിമാ മേഖലയെയും അവതാളത്തിലാക്കി. അതുകൊണ്ട് ഒ.ടി.ടി പ്ലാറ്റ്‌ഫോമിലായിരുന്നു ചിത്രം പുറത്തിറക്കിയത്. എന്നിട്ടും സിനിമയും അതിലെ പാട്ടുകളും പ്രേക്ഷകർ ഏറ്റെടുത്തിൽ ഏറെ സന്തോഷമുണ്ട്. എന്റെ കരിയറിൽ ഇത്രയും വിപുലമായ പ്രതികരണം ലഭിച്ച പാട്ട് വേറെയില്ലെന്നു പറയാം. ഒരു വികാരമായാണ് ശ്രോതാക്കൾ ഈ ഗാനത്തെ കണ്ടത്. കോലക്കുഴൽ വിളികേട്ടോ..., ഇന്നലെ എന്റെ നെഞ്ചിലേ..., അമ്മ മഴക്കാറ്..., കാറ്റേ കാറ്റേ..., കാത്തിരുന്നു... എന്നിങ്ങനെയുള്ള ഓരോ പാട്ടും ഓരോ കാലത്ത് തരംഗമായിരുന്നവയാണ്. സംഗീതജീവിതത്തിൽ 25 വർഷം പിന്നിടുന്ന ഈ വേളയിൽ ഇത്തരത്തിൽ ജനസമ്മതി നേടിയ ഗാനങ്ങൾക്ക് ഈണമൊരുക്കാൻ സാധിച്ചത് ഈശ്വരാനുഗ്രഹംകൊണ്ടുമാത്രം...'
പകരക്കാരനില്ലാത്ത സംഗീതയാത്രയാണ് ജയചന്ദ്രന്റേത്. 'ഒരു സംഗീത സംവിധായകന് അയാൾ ഉണ്ടാക്കുന്ന പാട്ടുകൾക്ക് കേൾവിക്കാരില്ലെങ്കിൽ അയാൾ വെറും പൂജ്യമാണ്. എന്റെ പാട്ടുകൾ കേൾക്കുവാനും ഹൃദയത്തിലേറ്റുവാനും ആളുകളുണ്ടായതുകൊണ്ടാണ് നിങ്ങളെന്നെ ഈ കൂടിക്കാഴ്ചക്ക് വിളിക്കാൻ കാരണം. ലോകമെമ്പാടും യാത്ര ചെയ്യുമ്പോൾ പലരും എന്നെ വന്ന് കെട്ടിപ്പിടിക്കാറുണ്ട്. പലരും കൈകളിൽ ചുംബിക്കാറുണ്ട്. കരയാറുണ്ട്. പ്രവാസികളായ മലയാളികളിൽ പലരുടെയും ജീവിതം സുഖകരമല്ലെങ്കിലും അവരിൽ പലർക്കും എന്റെ പാട്ടുകൾ സാന്ത്വനമാകാറുണ്ടെന്ന് പറയുമ്പോഴുണ്ടാകുന്ന സന്തോഷം ചെറുതല്ല. മാതാപിതാക്കളുടെയും ഗുരുക്കന്മാരുടെയും മാത്രമല്ല, ഇവരെപ്പോലുള്ളവരുടെയും അനുഗ്രഹംകൊണ്ടുകൂടിയാണ് 25 വർഷം നിലനിൽക്കാൻ കഴിഞ്ഞതെന്നും ഞാൻ വിശ്വസിക്കുന്നു.'
ആലാപനരംഗത്ത് പുതുമുഖങ്ങളെ അവതരിപ്പിക്കാനുള്ള ധൈര്യം കാണിച്ചതും ജയചന്ദ്രനായിരുന്നു.
'പുതുമുഖ ഗായകരിൽ പലരും നല്ല ടാലന്റുള്ളവരാണ്. എന്നാൽ അവർക്ക് വേണ്ടത്ര അവസരം ലഭിക്കാറില്ല. റിയാലിറ്റി ഷോകളിൽ പല കുട്ടികളുടെയും പാട്ടു കേട്ട് അത്ഭുതപ്പെട്ടിട്ടുണ്ട്. ഇനിയുള്ള ലക്ഷ്യം പുതിയ ശബ്ദങ്ങൾ കണ്ടെത്തി അവതരിപ്പിക്കുക എന്നുള്ളതാണ്. ആദ്യകാലത്ത് പാട്ടുകാരെ മനസ്സിൽ കണ്ടാണ് ഗാനങ്ങളൊരുക്കിയിരുന്നത്. പ്രമദവനവും, ഹരിമുരളീരവവും, മധുരം ജീവാമൃതബിന്ദുവും, ദേവാങ്കണങ്ങൾ കയ്യൊഴിഞ്ഞ താരകവുമെല്ലാം ദാസ് സാറിനെ കണ്ടുകൊണ്ടാണ് ഒരുക്കിയത്. കൺമഷി എന്ന ചിത്രത്തിലെ ചക്കരമാവിൻ എന്ന ഗാനവും മല്ലുസിംഗിലെ ചംചം എന്ന ഗാനവും എനിക്ക് അദ്ദേഹത്തക്കൊണ്ട് പാടിക്കാൻ കഴിഞ്ഞു. എന്നാലിപ്പോൾ പാട്ടുകാരനെ കണ്ടുകൊണ്ടല്ല പാട്ടുകളൊരുക്കുന്നത്. പുതിയ ശബ്ദമാണ് പലർക്കും ആവശ്യം. പാട്ടുകാരിൽ പ്രശസ്തരായവരെയും പുതുമുഖങ്ങളെയും അവതരിപ്പിക്കാൻ ഭാഗ്യം ലഭിച്ചിട്ടുണ്ട്. ശ്രേയാ ഘോഷാലിനെപ്പോലെ ഹിന്ദിയിൽനിന്നുപോലും ഗായകരെ കൊണ്ടുവന്ന് പാടിച്ച് അവാർഡിന് അർഹരാക്കാൻ കഴിഞ്ഞതും ഭാഗ്യമായാണ് കാണുന്നത്. സെല്ലുലോയ്ഡ് എന്ന ചിത്രത്തിലൂടെ വൈക്കം വിജയലക്ഷ്മിയെയും ശ്രീറാമിനെയും അവതരിപ്പിച്ചിരുന്നു.'
ആലാപനരംഗത്ത് സജീവമാകാത്തതിനെക്കുറിച്ചും ജയചന്ദ്രന് വ്യക്തമായ അഭിപ്രായമുണ്ട്.
'എന്റെയുള്ളിലെ പിന്നണിഗായകനെക്കുറിച്ച് എനിക്ക് ശുഭാപ്തിവിശ്വാസമില്ല. പല പാട്ടുകളും ട്രാക്ക് പാടി സംവിധായകരെ കേൾപ്പിക്കുമ്പോൾ ഇതുതന്നെ പോരെയെന്ന് ചോദിക്കും. എന്നാൽ ഞാൻ വിയോജിക്കാറാണ് പതിവ്. കാരണം എന്നിലെ സംഗീത സംവിധായകൻ പാട്ടുകാരനാകാൻ സമ്മതിക്കാറില്ല.'
തിരുവനന്തപുരം കോളേജ് ഓഫ് എൻജിനീയറിംഗിൽനിന്നും ഇലക്ട്രിക്കൽ എൻജിനീയറിംഗ് ബിരുദം നേടിയ ജയചന്ദ്രന്റെ അച്ഛനും അപ്പൂപ്പനും അമ്മാവനുമെല്ലാം എൻജിനീയർമാരായിരുന്നു. അവരുടെ പിൻമുറക്കാരായി ജയചന്ദ്രനും ചേട്ടനും എൻജിനീയറിംഗ് ബിരുദം സ്വന്തമാക്കിയെങ്കിലും സംഗീതത്തിന്റെ തലവര മാറ്റാനായിരുന്നു ഇദ്ദേഹത്തിന്റെ നിയോഗം. ഭാര്യ പ്രിയയും രണ്ട് ആൺമക്കളും ചേർന്ന് ആ വീട്ടിൽ പാട്ടിന്റെ പാലാഴി തീർക്കുകയാണ്. ദേശത്തിന്റെയും ഭാഷയുടെയും അതിർവരമ്പുകൾ മറികടന്ന് ഒരു ജനതയുടെ ആത്മഗീതം എന്ന നിലയുള്ള അദ്ദേഹത്തിന്റെ സംഗീതയാത്രയ്ക്ക് ഗുരുത്വത്തിന്റെ കൃപകടാക്ഷവും കൂട്ടായുണ്ട്.
