ചൈനക്ക് പുറത്ത് തങ്ങളുടെ ആസ്ഥാനം ഒരുക്കാനുള്ള ടിക് ടോക് നീക്കത്തിന് തിരിച്ചടി. പ്രധാന വിപണിയായ ഇന്ത്യയിൽ നിരോധനം നേരിടുകയും വിവിധ രാജ്യങ്ങളിൽ നിരോധന ഭീഷണിയിലുമാണ് ടിക് ടോക്. അതിനിടെയാണ് ലണ്ടനിൽ തങ്ങളുടെ ആസ്ഥാനം സ്ഥാപിക്കാനുള്ള ടിക് ടോക് മാതൃകമ്പനി ബൈറ്റ് ഡാൻസിന്റെ പദ്ധതി ഉപേക്ഷിക്കുന്നത്. നേരത്തേ 3000 ത്തോളം പേർക്ക് ജോലി വാഗ്ദാനം ചെയ്യുന്ന പദ്ധതിയുമായി ബൈറ്റ് ഡാൻസ് ബ്രിട്ടീഷ് മന്ത്രാലയവുമായി ചർച്ചകൾ പുരോഗമിക്കുകയായിരുന്നു.
എന്നാൽ ഇപ്പോൾ പുതിയ സാഹചര്യത്തിൽ ടിക് ടോക് മാതൃകമ്പനി തന്നെ നിലപാടിൽ നിന്നും പിന്നോട്ട് വലിയുകയാണ്. അടുത്തിടെ ഉടലെടുത്ത ബ്രിട്ടീഷ് ചൈനീസ് വ്യാപാര പ്രശ്‌നങ്ങളാണ് പുതിയ സംഭവത്തിലേക്ക് നയിച്ചത്. ചൈനീസ് ഇലക്ട്രോണിക് കമ്പനി വാവ്വെക്ക് കഴിഞ്ഞ ദിവസമാണ് ബ്രിട്ടൻ നിരോധനം ഏർപ്പെടുത്തിയത്. അതിന് പിന്നാലെയാണ് ലണ്ടൻ ആസ്ഥാന നീക്കം ടിക് ടോക് അവസാനിപ്പിച്ചത്. ടിക് ടോക്കിന്റെ പ്രദേശിക ആസ്ഥാനം നിലനിൽക്കുന്ന ഡബ്ലിൻ ആണ് അടുത്തതായി ടിക് ടോക് തങ്ങളുടെ ആസ്ഥാനമാക്കുവാൻ ആലോചിക്കുന്നത്. നിലവിലുള്ള അടിസ്ഥാന സൗകര്യങ്ങളും അനുമതികളും ഉള്ളതിനാൽ ഈ ആസ്ഥാന മാറ്റം വലിയ ബാധ്യതയുണ്ടാക്കില്ലെന്നാണ് ടിക് ടോക് മാതൃകമ്പനിയുടെ പ്രതീക്ഷ.
അടുത്തിടെ ഇന്ത്യയിൽ നിരോധിക്കപ്പെട്ടതോടെ കടുത്ത പ്രതിസന്ധിയാണ് ലോകത്താകമാനം 100 കോടിയോളം ഉപയോക്താക്കളുള്ള ടിക് ടോക്കിന് സംഭവിച്ചിരിക്കുന്നത്. വിവിധ രാജ്യങ്ങളിൽ ടിക് ടോക് നിരോധം എന്ന മുറവിളി ഉയരുകയാണ്
