ഷിംല- ഗോതമ്പുണ്ടയില്‍ ഒളിപ്പിച്ച പടക്കം കഴിച്ചതിനെ തുടര്‍ന്ന് പശുവിനു പരിക്കേറ്റ സംഭവത്തില്‍ ഒരാളെ ഹിമാചല്‍ പോലീസ് അറസ്റ്റ് ചെയ്തു. ബിലാസ്പൂര്‍ ടൗണില്‍ നടന്ന സംഭവത്തില്‍ പശുവിന്റെ വായക്ക് ഗുരുതരമായ പരിക്കേറ്റിരുന്നു.
പാലക്കാട് സ്‌ഫോടകവസ്തു നിറച്ച തേങ്ങ കഴിച്ച് പരിക്കേറ്റ ആന ചരിഞ്ഞതിന് പിന്നാലെയാണ് മേയ് 26 ന് ഹിമാചല്‍ പ്രദേശില്‍ നടന്ന ഈ സംഭവം വിവാദമായത്.
വായില്‍നിന്ന് ചോരയൊലിച്ച് നില്‍ക്കുന്ന പശുവിന്റെ വിഡിയോ സമൂഹമാധ്യമങ്ങളില്‍ വ്യാപകമായി പ്രചരിച്ചു. പശുവിന്റെ ഉടമസ്ഥന്‍ തന്നെയാണ് വിഡിയോ സമൂഹമാധ്യമങ്ങളില്‍ പങ്കുവച്ചത്. പശു എട്ടുമാസം ഗര്‍ഭിണിയാണെന്ന് ഉടമസ്ഥന്‍ പറഞ്ഞു. സംഭവത്തില്‍ കേസ് രജിസ്റ്റര്‍ ചെയ്തതായി ബിലാസ്പൂര്‍ പോലീസ് സൂപ്രണ്ട് ദിവാകര്‍ ശര്‍മ അറിയിച്ചു. വിള നശിപ്പിക്കാന്‍ വരുന്ന വന്യമൃഗങ്ങളെ തുരത്തുന്നതിനായി ഇത്തരത്തില്‍ ഭക്ഷ്യവസ്തുക്കളില്‍ സ്‌ഫോടക വസ്തു നിറച്ചുനല്‍കുന്നത് പ്രദേശത്ത് വ്യപകമാണെന്നും എന്നാല്‍ പലപ്പോഴും അപകടത്തില്‍പ്പെടുന്നത് വളര്‍ത്തു മൃഗങ്ങളാണെന്നും വനംവകുപ്പ് ഉദ്യോഗസ്ഥര്‍ പറഞ്ഞു.
