ന്യൂദല്‍ഹി- ദല്‍ഹിയില്‍ 75 ശതമാനം കൊറോണ വൈറസ് രോഗികളും രോഗലക്ഷണങ്ങള്‍ പ്രകടിപ്പിച്ചിരുന്നില്ലെന്ന് മുഖ്യമന്ത്രി അരവിന്ദ് കെജ്‌രിവാൾ. ചികിത്സയിലുള്ള കോവിഡ് രോഗികളെ രോഗലക്ഷണങ്ങള്‍ പ്രകടിപ്പിച്ചില്ലെങ്കില്‍ 14 ദിവസത്തിന് ശേഷം ഡിസ്ചാര്‍ജ് ചെയ്യാന്‍ അനുമതി നല്‍കി കേന്ദ്രം മാര്‍ഗനിര്‍ദ്ദേശം പുറപ്പെടുവിച്ച സാഹചര്യത്തിലാണ് ദല്‍ഹി മുഖ്യമന്ത്രിയുടെ വെളിപ്പെടുത്തല്‍.
"ഇപ്പോൾ 1,463 രോഗികളെ മാത്രമേ ആശുപത്രികളില്‍ ചികിത്സിക്കുന്നുള്ളൂ. ബാക്കിയുള്ളവർ - ഏകദേശം 75 ശതമാനം കോവിഡ് പോസിറ്റീവ് കേസുകള്‍ ഒന്നുകിൽ രോഗലക്ഷണം കാണിക്കാത്തവരോ അല്ലെങ്കില്‍ നേരിയ ലക്ഷണങ്ങള്‍ മാത്രം പ്രകടിപ്പിക്കാത്തവരോ ആണ്. കേന്ദ്രത്തിന്റെ ഏറ്റവും പുതിയ മാർഗ്ഗനിർദ്ദേശങ്ങൾ അനുസരിച്ച് അവരെ വീടുകളിൽ ചികിത്സിക്കാൻ കഴിയും. ഞങ്ങളുടെ ടീമുകൾ അവരുടെ വീടുകൾ സന്ദർശിച്ച് എല്ലാ പ്രോട്ടോക്കോളുകളും പാലിക്കുന്നുണ്ടെന്ന് ഉറപ്പുവരുത്തും." കെജ്‌രിവാൾ വീഡിയോ പ്രസ്മീറ്റില്‍ പറഞ്ഞു.
ഇതുവരെ 6,923 കൊറോണ വൈറസ് കേസുകളാണ് രാജ്യതലസ്ഥാനത്ത് റിപ്പോർട്ട് ചെയ്യപ്പെട്ടത്. ഇതില്‍ 2,069 രോഗികൾ സുഖം പ്രാപിച്ചു; 73 രോഗികൾ മരിച്ചു. മരിച്ചവരിൽ എൺപത്തിരണ്ട് ശതമാനം പേർ 50 വയസ്സിന് മുകളിലുള്ളവരാണ്. മുതിർന്ന പൗരന്മാർ കൂടുതൽ ദുർബലരാണ്. പ്രായമായവരെ പരിപാലിക്കണം, അവർ പുറത്തുകടക്കുന്നത് ഒഴിവാക്കണം മുഖ്യമന്ത്രി നിര്‍ദ്ദേശിച്ചു.
