ശിവസേന നേതാവ് ബാല്‍ താക്കറേയുടെ ജീവിതം ആസ്പദമാക്കി അഭിജിത് പന്‍സെ സംവിധാനം ചെയ്യുന്ന താക്കറേയുടെ ട്രെയ്‌ലര്‍ പുറത്ത്. ബാല്‍ താക്കറേ ആയി സിനിമയില്‍ വേഷമിടുന്നത് പ്രശസ്ത നടന്‍ നവാസുദ്ദീന്‍ സിദ്ധിഖി ആണ്. ചിത്രത്തില്‍ താക്കറേയുടെ ഭാര്യ തായ് താക്കറേ ആയി എത്തുന്നത് അമൃത റാവു ആണ്.
ഒരു കലാപത്തിന്റെ അന്തരീക്ഷത്തോടെയാണ് ചിത്രത്തിന്റെ ട്രെയ്‌ലര്‍ ആരംഭിക്കുന്നത്. 'മുംബൈ നഗരത്തെ അനുനയിപ്പിക്കാന്‍ ഈ സമയത്ത് ഒരാള്‍ക്കു മാത്രമേ കഴിയൂ' എന്ന മുഖവുരയോടെ താക്കറേയുടെ സത്വസിദ്ധമായ പ്രസംഗങ്ങളൊന്നിലേക്ക് ട്രെയ്‌ലര്‍ നീങ്ങുന്നു. താക്കറേയുടെ ചേഷ്ടകളും സംസാര ശൈലിയും നവാസുദ്ദീന്‍ സിദ്ധിഖിയില്‍ ഭദ്രമാണെന്നാണ് ട്രെയ്‌ലര്‍ നല്‍കുന്ന സൂചനകള്‍. തനിക്കു ലഭിക്കുന്ന കഥാപാത്രങ്ങളെ തനിമയോടെ അവതരിപ്പിക്കുക എന്നത് നവാസുദ്ദീന്‍ സിദ്ധിഖിയുടെ ഏറ്റവും വലിയ പ്രത്യേകതയാണ്. നവാസുദ്ദീന്‍ സിദ്ധിഖിയിലൂടെ ജീവിക്കുന്ന ബാല്‍ താക്കറേയെ പ്രേക്ഷകര്‍ക്ക് വീണ്ടും കാണുവാന്‍ സാധിക്കുമെന്ന കാര്യത്തില്‍ സംശയമില്ല. താന്‍ ഇതു വരെ ചെയ്തതില്‍ വെച്ചേറ്റവും ശ്രമകരമായ കഥാപാത്രം ബാല്‍ താക്കറേയുടേതായിരുന്നെന്ന് നവാസുദ്ദീന്‍ തന്റെ ട്വിറ്ററില്‍ കുറിച്ചിരുന്നു. മഹാരാഷ്ട്രാ രാഷ്ട്രീയത്തില്‍ ഇന്നും പ്രബലരായിരിക്കുന്ന ശിവസേനയുടെ ഏറ്റവും വലിയ നേതാവായ ബാല്‍ താക്കറേയുടെ ജീവിതം കാണുവാന്‍ കാത്തിരിക്കുകയാണ് ചലച്ചിത്ര പ്രേമികള്‍.
