ലഖ്‌നൗ- ഹിന്ദു മതത്തിനെതിരെ തെറ്റായ വിവരം പ്രചരിപ്പിക്കുകയും ആളുകളെ ക്രിസ്തു മതം സ്വീകരിക്കാന്‍ പ്രേരിപ്പിക്കുകയും ചെയ്‌തെന്നാരോപിച്ച് 271 പേര്‍ക്കെതിരെ ഉത്തര്‍ പ്രദേശിലെ ജോന്‍പൂരില്‍ പോലീസ് കേസ് രജിസ്റ്റര്‍ ചെയ്തു. കോടതി നിര്‍ദേശ പ്രകാരമാണ് കേസെടുത്തത്. കേസില്‍ മൂന്ന് പുരോഹിരുടെ പേരുകള്‍ മാത്രമാണ് പരാമര്‍ശിച്ചിട്ടുള്ളത്. ബാക്കിയുള്ളവര്‍ ഇവരുടെ സഹായികളാണെന്ന് പറയപ്പെടുന്നു. തീവ്ര ഹിന്ദുത്വ സംഘടനയായ ഹിന്ദു ജാഗരണ്‍ മഞ്ച് പ്രവര്‍ത്തകര്‍ നല്‍കിയ പരാതിയിലാണ് പോലീസ് കേസെടുത്തത്. ജോന്‍പൂര്‍, അസംഗഢ്, വാരാണസി, ഗാസിപൂര്‍ എന്നീ ജില്ലകളില്‍ കഴിഞ്ഞ ഏതാനും വര്‍ഷങ്ങളായി ഇവര്‍ ആളുകളെ ക്രിസ്തുമതത്തിലേക്ക് മാറാന്‍ പ്രേരിപ്പിച്ചു വരികയാണെന്നും ചര്‍ച്ചിലേക്ക് ക്ഷണിക്കുകയാണെന്നും പരാതി നല്‍കിയ ഹിന്ദു ജാഗരണ്‍ മഞ്ച് ആരോപിക്കുന്നു. ബല്‍ദെ ഗ്രാമത്തിലെ ചര്‍ച്ചിലേക്കാണ് ഇവര്‍ പ്രാര്‍ത്ഥനയില്‍ പങ്കെടുക്കാന്‍ ആളുകളെ ക്ഷണിക്കുന്നത്.
ഞായറാഴ്ചകളിലും ചൊവ്വാഴ്ചകളിലും ചര്‍ച്ചില്‍ നടക്കുന്ന പ്രാര്‍ത്ഥനയ്ക്കു ശേഷം ഇവര്‍ ഹിന്ദു മതത്തെ കുറിച്ച് ആളുകള്‍ക്കിടയില്‍ തെറ്റായ വിവരം പ്രചരിപ്പിക്കുകയും ക്രിസ്തു മതത്തിലേക്കു മാറാന്‍ പ്രേരിപ്പിക്കുകയുമാണ് ചെയ്യുന്നതെന്ന് പരാതിക്കാര്‍ പറയുന്നു. ചര്‍ച്ചിലെത്തുന്നവര്‍ക്ക് ഇവര്‍ നിരോധിത മരുന്ന് നല്‍കുന്നതായും ഹിന്ദു ജാഗരണ്‍ മഞ്ച് പ്രവര്‍ത്തകനും പരാതിക്കാരന്റെ അഭിഭാഷകനുമായ ബ്രിജേഷ് സിങ് ആരോപിക്കുന്നു. ഇതിനെതിരെ കേസെടുക്കാന്‍ ഉത്തരവിടണമെന്നാവശ്യപ്പെട്ട് ബ്രിജേഷ് ഓഗസ്റ്റ് രണ്ടിന് കോടതിയെ സമീപിച്ചിരുന്നു. തുടര്‍ന്ന് ഓഗസ്റ്റ് 31-നാണ് കോടതി കേസെടുക്കാന്‍ പോലീസിന് നിര്‍ദേശം നല്‍കിയത്.
