തൊടുപുഴ - ചുവന്ന കാറില്‍ എത്തിയവര്‍ റോഡില്‍ മഞ്ച് ഇട്ടതിന് ശേഷം കുട്ടികളോട് എടുത്തു നല്‍കാന്‍ പറഞ്ഞെന്ന് പരാതി. പരിഭ്രമിച്ച കുട്ടികള്‍ വിവരം സ്‌കൂളില്‍ അറിയിച്ചു. ബുധനാഴ്ച രാവിലെ 9ന് സ്‌കൂളില്‍ പോകുമ്പോള്‍ ഐരാമ്പിള്ളിയിലാണ് സംഭവം. കാളിയാര്‍ പോലീസില്‍ അറിയിച്ചതിനെ തുടര്‍ന്ന് പോലീസ് എത്തി സമീപത്തെ സിസിടിവി ദൃശ്യങ്ങള്‍ പരിശോധിച്ചു.
കുട്ടികള്‍ പറഞ്ഞ സമയത്ത് ഇത് വഴി ചുവന്ന കാര്‍ കടന്നു പോകുന്നതായി ദൃശ്യങ്ങളില്‍ ഉണ്ട്. റോഡില്‍ നിന്ന് മഞ്ചും കണ്ടെടുത്തു. നേരത്തെ വണ്ണപ്പുറം മേഖലയില്‍ ചിലയിടങ്ങളില്‍ ഇത്തരത്തില്‍ ഒരു സംഘം എത്തി കുട്ടികളെ തട്ടിക്കൊണ്ട് പോകാന്‍ ശ്രമിച്ചിരുന്നു. രണ്ട് വാഹനങ്ങളിലായാണ് ഇവരെത്തിയത്. വിഷയം ഗൗരവത്തിലെടുത്ത് അന്വേഷണം ആരംഭിച്ചതായി കാളിയാര്‍ പോലീസ് അറിയിച്ചു.
