കൊല്ലം - ഓയൂരില്‍ ഭാര്യക്ക് നിര്‍ബന്ധിച്ച് മദ്യം നല്‍കി പീഡിപ്പിക്കാന്‍ ശ്രമിച്ച ഭര്‍ത്താവിനെയും സുഹൃത്തിനെയും പൂയപ്പള്ളി പോലീസ് അറസ്റ്റ് ചെയ്തു. യുവതിയുടെ ഭര്‍ത്താവ് വിഷ്ണു ബാലസുബ്രഹ്മണ്യന്‍(26), ഇയാളുടെ സുഹൃത്ത് മരുതമണ്‍പള്ളികാറ്റാടി സ്വദേശി ശ്രീക്കുട്ടന്‍ എന്ന് വിളിക്കുന്ന അരുണ്‍ (27) എന്നിവരാണ് അറസ്റ്റിലായത്. കഴിഞ്ഞ ദിവസം മദ്യവുമായി വിഷ്ണുവും ശ്രീക്കുട്ടനും വീട്ടിലെത്തി അവിടെയിരുന്നു ഇരുവരും മദ്യപിക്കുകയും പിന്നീട് വിഷ്ണുവിന്റെവിന്റെ ഭാര്യയെ നിര്‍ബന്ധിച്ച് മദ്യം കുടിപ്പിക്കാന്‍ ശ്രമിക്കുകയും ചെയ്തു. മദ്യലഹരിയിലായ ശ്രീക്കുട്ടന്‍ യുവതിയെ പീഡിപ്പിക്കാന്‍ ശ്രമിച്ചു. ഇതിനെ എതിര്‍ത്ത യുവതി ഭര്‍ത്താവിനോട് വിവരം പറഞ്ഞതിനെ തുടര്‍ന്ന് ഭര്‍ത്താവ് ഭാര്യയെ തല്ലുകയും മുഖത്തിടിച്ച ശേഷം മുടിയില്‍ കുത്തിപ്പിടിച്ച് ഭിത്തിയില്‍ ഇടിക്കുകയും ചെയ്തു. മുഖത്ത് പരിക്കേറ്റ യുവതി ആശുപത്രിയില്‍ ചികിത്സ തേടി. പരാതിയുടെ അടിസ്ഥാനത്തില്‍ കേസെടുത്ത പോലീസ് പ്രതികളെ അറസ്റ്റ് ചെയ്യുകയായിരുന്നു. കോടതിയില്‍ ഹാജരാക്കിയ ഇരുവരെയും റിമാന്റ് ചെയ്തു.
