ലഖ്‌നൗ - ഈ വര്‍ഷം നടക്കാനിരിക്കുന്ന പൊതുതെരഞ്ഞെടുപ്പിന് മുന്നോടിയായി സമാജ്‌വാദി പാര്‍ട്ടി നേതാവ് അഖിലേഷ് യാദവ് ഉത്തര്‍പ്രദേശില്‍ കോണ്‍ഗ്രസിന് 17 ലോക്‌സഭാ സീറ്റുകള്‍ വാഗ്ദാനം ചെയ്തതായി റിപ്പോര്‍ട്ട്. 15 സീറ്റുകള്‍ വരെ നേരത്തെ വാഗ്ദാനം ചെയ്തിരുന്നു.
സീറ്റ് വിഭജനം അന്തിമമായാല്‍ മാത്രമേ താന്‍ ചൊവ്വാഴ്ച ഉത്തര്‍പ്രദേശില്‍ കോണ്‍ഗ്രസിന്റെ ഭാരത് ജോഡോ ന്യായ് യാത്രയില്‍ ചേരുകയുള്ളൂവെന്ന് അഖിലേഷ് യാദവ് പറഞ്ഞു.
'ചര്‍ച്ചകള്‍ നടക്കുന്നു. അങ്ങോട്ടും ഇങ്ങോട്ടും ലിസ്റ്റുകള്‍ വന്നിട്ടുണ്ട്. സീറ്റുകള്‍ ഉറപ്പിക്കുന്ന നിമിഷം സമാജ്‌വാദി പാര്‍ട്ടി കോണ്‍ഗ്രസിന്റെ ന്യായ യാത്രയില്‍ ചേരും - അദ്ദേഹം പറഞ്ഞു. പാര്‍ട്ടി വൃത്തങ്ങള്‍ പറയുന്നതനുസരിച്ച്, മൊറാദാബാദ്, ബല്ലിയ തുടങ്ങിയ സീറ്റുകളാണ് കോണ്‍ഗ്രസിന് വേണ്ടത്, ചര്‍ച്ച ഇപ്പോഴും പുരോഗമിക്കുകയാണ്.
2019 ലെ ലോക്‌സഭാ തിരഞ്ഞെടുപ്പില്‍ മൊറാദാബാദ് സീറ്റില്‍ സമാജ്‌വാദി പാര്‍ട്ടി വിജയിച്ചു. മൊറാദാബാദിലെ മേയര്‍ തിരഞ്ഞെടുപ്പില്‍ കോണ്‍ഗ്രസ് രണ്ടാം സ്ഥാനത്തെത്തിയിരുന്നു.
സംസ്ഥാന അധ്യക്ഷന്‍ അജയ് റായിക്ക് ബല്ലിയ സീറ്റ് വേണമെന്നാണ് കോണ്‍ഗ്രസ് ആഗ്രഹിക്കുന്നത്. സമാജ്‌വാദി പാര്‍ട്ടിയുടെ ശക്തികേന്ദ്രങ്ങളിലൊന്നായാണ് ബലിയ കണക്കാക്കപ്പെടുന്നത്.
28 സീറ്റുകളുടെ പട്ടികയാണ് കോണ്‍ഗ്രസ് സമാജ്‌വാദി പാര്‍ട്ടിക്ക് നല്‍കിയതെന്ന് വൃത്തങ്ങള്‍ അറിയിച്ചു. ഇതില്‍ 10 സീറ്റുകളില്‍ ഗണ്യമായ മുസ്‌ലിം ജനസംഖ്യയുണ്ട്.
അതിനിടെ, ലോക്‌സഭാ തിരഞ്ഞെടുപ്പിനുള്ള 11 സ്ഥാനാര്‍ത്ഥികളെ കൂടി സമാജ്‌വാദി പാര്‍ട്ടി തിങ്കളാഴ്ച പ്രഖ്യാപിച്ചു.
