ന്യൂദല്‍ഹി- 2020ലെ വടക്കുകിഴക്കന്‍ ദല്‍ഹി കലാപത്തിനിടെ രണ്ടുപേരെ കൊലപ്പെടുത്തിയ കേസില്‍ പ്രതികളായ നാലുപേരെ കോടതി വെറുതെവിട്ടു.
2020 ഫെബ്രുവരി 25 ന് ബ്രിജ്പുരിയില്‍ വര്‍ഗീയ കലാപത്തിനിടെ അഷ്ഫാഖ് ഹുസൈനെയും സക്കീറിനെയും കൊലപ്പെടുത്തിയതിന് അശോക്, അജയ്, ശുഭം, ജിതേന്ദര്‍ കുമാര്‍ എന്നിവര്‍ക്കെതിരെ രജിസ്റ്റര്‍ ചെയ്ത രണ്ട് കേസുകളിലാണ് അഡീഷണല്‍ സെഷന്‍സ് ജഡ്ജി പുലസ്ത്യ പ്രമാചലയുടെ വിധി.
സക്കീറിന്റെയും ഹുസൈന്റെയും കൊലപാതകത്തില്‍ പ്രതികളിലൊരാള്‍ക്കും പങ്കുണ്ടെന്ന് തെളിയിക്കാന്‍ പ്രോസിക്യൂഷന് കഴിഞ്ഞില്ലെന്ന് കോടതി പറഞ്ഞു.
'പ്രതികളില്‍ ആരും തന്നിരിക്കുന്ന സ്ഥലത്തും സമയത്തും കലാപകാരികളുടെ ഭാഗമാണെന്ന് സ്ഥാപിക്കാന്‍ തെളിവില്ല. അതിനാല്‍, ഈ കേസില്‍ ആരോപിക്കപ്പെട്ട എല്ലാ കുറ്റങ്ങളില്‍നിന്നും എല്ലാ പ്രതികളെയും വെറുതെ വിടുന്നു,' കോടതി പറഞ്ഞു.
ഇരുവരെയും കൊലപ്പെടുത്തിയ കലാപകാരികളായ ജനക്കൂട്ടത്തിന്റെ ഭാഗമാണോ പ്രതികള്‍ എന്നതുമായി ബന്ധപ്പെട്ട്, കോടതി, കേസിലെ ദൃക്‌സാക്ഷി കൂറുമാറിയെന്നും പ്രോസിക്യൂഷന്റെ വാദത്തെ പിന്തുണച്ചില്ലെന്നും പറഞ്ഞു.
കോള്‍ ഡീറ്റെയില്‍സ് റെക്കോര്‍ഡ് (സിഡിആര്‍), കത്രിക, വാളുകള്‍, കുറ്റാരോപിതരായ ചിലര്‍ ധരിച്ചിരുന്ന വസ്ത്രങ്ങള്‍ എന്നിവ കണ്ടെടുത്തതായി ചില സാഹചര്യ തെളിവുകള്‍ ഉണ്ടായിരുന്നുവെങ്കിലും കേസ് സംശയാതീതമായി തെളിയിക്കാന്‍ അത് പര്യാപ്തമായില്ല. സിഡിആറിന്റെ അടിസ്ഥാനത്തില്‍ മാത്രം ഒരു പ്രത്യേക സ്ഥലത്ത് ഒരു പ്രത്യേക വ്യക്തിയുടെ സാന്നിധ്യത്തെക്കുറിച്ച് കൃത്യമായ നിഗമനത്തിലെത്താന്‍ കഴിയില്ലെന്ന് കോടതി പറഞ്ഞു.
'പ്രോസിക്യൂഷന് കണ്ടെടുത്ത വാളുകളിലും കത്രികയിലും മരിച്ചയാളുടെ രക്തത്തിന്റെ അവശിഷ്ടങ്ങള്‍ സ്ഥിരീകരിച്ചില്ല. അവ മരിച്ചവരെ കൊലപ്പെടുത്തിയ ആയുധങ്ങളാണെന്ന് കാണിക്കാന്‍ തെളിവില്ലെന്നും അതില്‍ പറയുന്നു. വസ്ത്രത്തില്‍ മരിച്ചയാളുടെ രക്തക്കറ ഉണ്ടെന്ന് തെളിയിക്കാന്‍ പ്രോസിക്യൂഷന് ഫോറന്‍സിക് പരിശോധന നടത്തിയിട്ടില്ലെന്നും കോടതി പറഞ്ഞു.
