തിരുവനന്തപുരം- യൂണിവേഴ്‌സിറ്റി എല്‍.ജി.എസ് പരീക്ഷക്കിടെ ആള്‍മാറാട്ടത്തിന് ശ്രമിച്ച ആളെ പിടികൂടിയത് ബയോമെട്രിക് പരിശോധനയില്‍. പി.എസ്.സി ആദ്യമായി ബയോമെട്രിക് പരിശോധന നടപ്പാക്കിയ പരീക്ഷയിലാണ് ആള്‍മാറാട്ടശ്രമം പിടികൂടിയത്. ഉദ്യോഗാര്‍ഥികളുടെ വിരലടയാള പരിശോധനക്കിടെയാണ് പരീക്ഷ എഴുതാനെത്തിയ ആള്‍ ഓടിരക്ഷപ്പെട്ടത്.
പൂജപ്പുര ചിന്നമ്മ മെമ്മോറിയില്‍ ഗേള്‍സ് സ്‌കൂളിലായിരുന്നു ആള്‍മാറാട്ടശ്രമം. തിരിച്ചറിയല്‍ പരിശോധനക്കിടെ പരീക്ഷ എഴുതാനെത്തിയ ആള്‍ ഇറങ്ങിയോടുകയായിരുന്നു. അധികൃതര്‍ നല്‍കിയ പരാതിയില്‍ പൂജപ്പുര പോലീസ് കേസെടുത്തു.
പരാതിയില്‍ പോലീസ് അന്വേഷണം നടത്തിവരികയാണ്. പരീക്ഷാ ഹാളില്‍നിന്ന് ഇറങ്ങിയോടിയ ഇയാള്‍ നിര്‍ത്തിയിട്ടിരുന്ന ഇരുചക്രവാഹനമെടുത്ത് കടന്നുകളയുകയായിരുന്നു. ഇയാള്‍ നേമം സ്വദേശിയുടെ പേരിലാണ് പരീക്ഷ എഴുതാനെത്തിയത്.
