ന്യൂദല്‍ഹി- വ്യവഹാരം നടത്തുന്നവരുടെ ജാതിയോ മതമോ കേസ് രേഖകളില്‍ പരാമര്‍ശിക്കുന്ന സമ്പ്രദായം നിര്‍ത്താന്‍ സുപ്രീം കോടതി അതിന്റെ രജിസ്ട്രിക്കും എല്ലാ ഹൈക്കോടതികള്‍ക്കും കീഴ്‌ക്കോടതികള്‍ക്കും നിര്‍ദേശം നല്‍കി.
ജസ്റ്റിസുമാരായ ഹിമ കോഹ്‌ലി, അഹ്‌സനുദ്ദീന്‍ അമാനുല്ല എന്നിവരടങ്ങിയ ബെഞ്ച് അടുത്തിടെ പുറപ്പെടുവിച്ച ഉത്തരവില്‍ ഈ സമ്പ്രദായം ഒഴിവാക്കണമെന്നും ഉടന്‍ നിര്‍ത്തണമെന്നും പറഞ്ഞു.
ഹൈക്കോടതിയിലോ തങ്ങളുടെ അധികാരപരിധിയിലുള്ള കീഴ്‌ക്കോടതികളിലോ സമര്‍പ്പിക്കുന്ന ഒരു ഹരജിയിലും കക്ഷികളുടെ മെമ്മോയിലും ഒരു ഹരജിക്കാരന്റെ ജാതിയോ മതമോ ഇല്ലെന്ന് ഉറപ്പാക്കാന്‍ എല്ലാ ഹൈക്കോടതികള്‍ക്കും നിര്‍ദ്ദേശം നല്‍കി.
'ഈ കോടതിയിലോ താഴെയുള്ള കോടതികളിലോ ഹരജിക്കാരുടെ ജാതി/മതം പരാമര്‍ശിക്കുന്നതിന് ഞങ്ങള്‍ കാരണമൊന്നും കാണുന്നില്ല. അത്തരമൊരു സമ്പ്രദായം ഒഴിവാക്കേണ്ടതും ഉടനടി അവസാനിപ്പിക്കേണ്ടതുമാണ്. അതിനാല്‍ ഒരു പൊതു ഉത്തരവ് പുറപ്പെടുവിക്കുന്നത് ഉചിതമാണെന്ന് കരുതുന്നു. കക്ഷികളുടെ ജാതിയോ മതമോ ഈ കോടതിക്ക് മുമ്പാകെ സമര്‍പ്പിച്ച ഒരു ഹരജി/നടപടിയുടെ കക്ഷികളുടെ മെമ്മോയില്‍ പരാമര്‍ശിക്കരുത്, അത്തരം വിശദാംശങ്ങള്‍ ചുവടെയുള്ള കോടതികള്‍ക്ക് മുമ്പാകെ നല്‍കിയിട്ടുണ്ടോ എന്നത് പരിഗണിക്കാതെ തന്നെ- ബെഞ്ച് ഉത്തരവില്‍ പറഞ്ഞു. രാജസ്ഥാനിലെ കുടുംബ കോടതിയില്‍ നിലനില്‍ക്കുന്ന വിവാഹ തര്‍ക്കത്തില്‍ ട്രാന്‍സ്ഫര്‍ പെറ്റീഷന്‍ അനുവദിച്ചു കൊണ്ടായിരുന്നു സുപ്രീം കോടതിയുടെ ഉത്തരവ്.
കേസ് പഞ്ചാബിലെ കുടുംബ കോടതിയിലേക്ക് മാറ്റാന്‍ അനുമതി നല്‍കിയ സുപ്രീം കോടതി, കേസ് രേഖകളില്‍ ജാതി പരാമര്‍ശിച്ചിരിക്കുന്നത് കണ്ട് അത്ഭുതപ്പെട്ടു.
