തിരുവനന്തപുരം- കേരളത്തില് കോവിഡ് കേസുകള് കൂടുതലാണെന്ന നിലയില് അനാവശ്യഭീതി സൃഷ്ടിക്കാന് ചിലര് ശ്രമിക്കുകയാണെന്ന് ആരോഗ്യ മന്ത്രി വീണാ ജോര്ജ്.
നവംബര് മാസത്തില് തന്നെ കോവിഡ് കേസുകളില് നേരിയ വര്ധന കണ്ടതിനാല് ആരോഗ്യ വകുപ്പ് ജാഗ്രത നിര്ദേശം നല്കി മുന്നൊരുക്ക പ്രവര്ത്തനങ്ങള് നടത്തിയിരുന്നു. സാമ്പിളുകള് ഹോള് ജിനോം സീക്വന്സിങ് പരിശോധനയ്ക്ക് അയയ്ക്കാന് മന്ത്രിതല യോഗത്തില് അന്നുതന്നെ തീരുമാനിച്ചു. നവംബര് മുതല് ഹോള് ജിനോമിക് പരിശോധനയ്ക്ക് സാമ്പിളുകള് അയച്ചു വരുന്നു. അതില് ഒരു സാമ്പിളില് മാത്രമാണ് ജെഎന് 1 കണ്ടെത്തിയിട്ടുള്ളത്. തിരുവനന്തപുരം കരകുളം സ്വദേശിയായ 79 വയസുള്ള ആള്ക്കാണ് ഇത് കണ്ടെത്തിയത്. അവര് ഗൃഹ ചികിത്സ കഴിഞ്ഞ് രോഗമുക്തമാകുകയും ചെയ്തതായും മന്ത്രി അറിയിച്ചു.
കഴിഞ്ഞ മാസങ്ങളില് ഇന്ത്യയില് നിന്നും സിംഗപ്പൂരിലേക്ക് പോയ 15 പേരില് ജെഎന് 1 ഉണ്ടെന്ന് സിംഗപ്പൂര് കണ്ടെത്തിയിട്ടുണ്ട്. ഇന്ത്യയുടെ മറ്റ് സംസ്ഥാനങ്ങളിലും ഈ കോവിഡ് വകഭേദം ഉണ്ടെന്നാണ് ഇതിനര്ഥം. കേരളത്തില് ഇതു പരിശോധനയിലൂടെ കണ്ടെത്തി എന്നുള്ളതാണ് പ്രത്യേകത. ഐ. സി. യു കിടക്കകളുടെയും വെന്റിലേറ്ററുകളുടെയും ഉപയോഗം കൂടുന്നുണ്ടോ എന്ന് തുടക്കം മുതല് പരിശോധിക്കുന്നുണ്ട്. ഇപ്പോഴുമത് നിരീക്ഷിക്കുന്നുണ്ടെന്നു മന്ത്രി പറഞ്ഞു.
