ചെന്നൈ - ശബരിമല യാത്രാക്ലേശം പരിഹരിക്കാന്‍ തീര്‍ഥാടകര്‍ക്കായി ചെന്നൈ-കോട്ടയം റൂട്ടില്‍ ദക്ഷിണ റെയില്‍വേ വന്ദേഭാരത് ശബരി സ്‌പെഷ്യല്‍ ട്രെയിനുകള്‍ ഓടിക്കും. ചെന്നൈ സെന്‍ട്രലില്‍നിന്ന് കോട്ടയം വരേയും തിരിച്ചുമാണ് സ്‌പെഷ്യല്‍ ട്രെയിന്‍ സര്‍വീസ് അനുവദിച്ചിരിക്കുന്നത്.
നമ്പര്‍ 06151 രാവിലെ 4.30 ന് എം.ജി.ആര്‍. ചെന്നൈ സെന്‍ട്രലില്‍നിന്ന് യാത്ര തിരിച്ച് വൈകിട്ട് 4.15ന് കോട്ടയത്ത് എത്തിച്ചേരും. ഡിസംബര്‍ 15, 17, 22, 24 തീയതികളില്‍ ചെന്നൈ കോട്ടയം പ്രത്യേക വന്ദേഭാരത് സര്‍വീസ് ഉണ്ടായിരിക്കും.
നമ്പര്‍ 06152 കോട്ടയം ചെന്നൈ സെന്‍ട്രല്‍ വന്ദേഭാരത് സ്‌പെഷ്യല്‍ ട്രെയിന്‍ കോട്ടയത്ത് നിന്ന് രാവിലെ 4.40ന് യാത്ര പുറപ്പെടും. വൈകിട്ട് 5.15ന് ചെന്നൈയിലെത്തിച്ചേരും. ഡിസംബര്‍ 16,18,23,25 തീയതികളില്‍ ഈ സര്‍വീസ് ഉണ്ടാകും.
പെരമ്പൂര്‍, കട്പാഡി, സേലം, ഈറോഡ്, തിരുപ്പുര്‍, പോഡനൂര്‍, പാലക്കാട്, തൃശ്ശൂര്‍, ആലുവ, എറണാകുളം ടൗണ്‍ എന്നീ സ്‌റ്റേഷനുകളില്‍ സ്‌റ്റോപ്പുണ്ട്. എട്ട് കോച്ചുകളുള്ള റേക്ക് ആണ് സര്‍വീസ് നടത്തുന്നത്. ഈ പ്രത്യേക ട്രെയിനുകളിലേക്കുള്ള മുന്‍കൂര്‍ ബുക്കിങ് വ്യാഴാഴ്ച രാവിലെ എട്ട് മണി മുതല്‍ ആരംഭിച്ചു.
