ദാവന്‍ഗരെ- കര്‍ണാടകയില്‍ പെണ്‍കുട്ടിയോട് മോശമായി പെരുമാറിയെന്നാരോപിച്ച് യുവാവിന് മര്‍ദനമേറ്റ സംഭവത്തില്‍ പ്രതിഷേധവുമായി ഹിന്ദുത്വ പ്രവര്‍ത്തകര്‍ രംഗത്ത്. കര്‍ണാടകയിലെ ദാവന്‍ഗരെ ജില്ലയിലാണ് സംഭവം. സംഭവത്തെ അപലപിച്ച യുവാവിന്റെ മാതാപിതാക്കളും ഹിന്ദു സംഘടനാ പ്രവര്‍ത്തകരും അക്രമികള്‍ക്കെതിരെ നടപടിയെടുക്കണമെന്ന് ആവശ്യപ്പെട്ടു.
ഞായറാഴ്ച വൈകുന്നേരമാണ് ദാവന്‍ഗരെ നഗരത്തിലെ ജലിനഗര്‍ സ്വദേശിയായ ശ്രീനിവാസിനെ ഒരു സംഘം ആക്രമിച്ചത്. ആക്രമണത്തിന് ശേഷം അക്രമികള്‍ ഇയാളെ പിന്നീട് ഒറ്റപ്പെട്ട സ്ഥലത്ത് തള്ളുകയായിരുന്നു.
ബോധം വന്നതിന് ശേഷം യുവാവ് മാതാപിതാക്കളെ വിളിച്ചുവരുത്തി. ആക്രമണത്തിനിരയായ ശ്രീനിവാസ് ആശുപത്രിയില്‍ ചികിത്സയിലാണ്. കുറ്റക്കാര്‍ക്കെതിരെ പോലീസ് നടപടിയെടുക്കുന്നില്ലെന്ന് കുടുംബാംഗങ്ങളും ഹിന്ദുത്വ സംഘടനാ പ്രവര്‍ത്തകരും ആരോപിച്ചു.
ഇത് സദാചാര പോലീസിംഗാണെന്ന് ഹിന്ദുത്വ പ്രവര്‍ത്തകര്‍ ആരോപിച്ചു. യുവാവ് മോശമായി പെരുമാറിയിരുന്നെങ്കില്‍ പോലീസില്‍ ഏല്‍പ്പിക്കുകയോ പരാതിപ്പെടുകയോ ചെയ്യണമായിരുന്നുവെന്ന് അവര്‍ പറഞ്ഞു.
ഇതൊരു ഗൂഢാലോചനയാണെന്നും അക്രമികളെ അറസ്റ്റ് ചെയ്യണമെന്നും ഹിന്ദുത്വ പ്രവര്‍ത്തകര്‍ ആവശ്യപ്പെട്ടു.
അടുത്തിടെയാണ് യുവാവിന്റെ വിവാഹനിശ്ചയം കഴിഞ്ഞതെന്നും ഉടന്‍ വിവാഹിതനാകുമെന്നും മാതാപിതാക്കള്‍ പറഞ്ഞു. യുവാവിനെതിരായ ആരോപണങ്ങള്‍ അവര്‍ നിരസിച്ചു. യുവാവിനെ ഷാദി മഹല്‍ പ്രദേശത്തേക്ക് വലിച്ചിഴച്ച് ക്രൂരമായി ആക്രമിക്കുകയായിരുന്നുവെന്ന് മാതാപിതാക്കള്‍ പറഞ്ഞു.
