വെടിനിർത്തൽ പ്രഖ്യാപിച്ചെങ്കിലും വിരലുകൾ കാഞ്ചിയിൽ തന്നെ; ഹമാസും ഇസ്രായിലും ഖത്തറും പറഞ്ഞത്

ഗാസ- ഒന്നരമാസത്തോളമായി ഗാസയിൽ ഇസ്രായിൽ നടത്തുന്ന അതിക്രൂരമായ ആക്രമണത്തിന് താൽക്കാലിക അന്ത്യം കുറിച്ച് പ്രഖ്യാപിച്ച വെടിനിർത്തലിൽ ഇസ്രായിലും ഹമാസും മധ്യസ്ഥ ശ്രമത്തിന് നേതൃത്വം വഹിച്ച ഖത്തറും വ്യത്യസ്ത പ്രസ്താവനകൾ പുറത്തിറക്കി. അതേസമയം, വെടിനിർത്തൽ പ്രഖ്യാപിച്ചെങ്കിലും പോരാട്ടം തുടരുമെന്ന് തന്നെയാണ് ഇസ്രായിലും ഹമാസും പുറത്തിറക്കിയ പ്രസ്താവനകളിൽ സൂചിപ്പിക്കുന്നത്. ഒക്ടോബർ ഏഴിന് ഇസ്രായിലിൽ കടന്നുകയറി 1200 പേരെ ഹമാസ് സൈന്യം കൊന്നതോടയാണ് ഇരുരാജ്യങ്ങൾക്കുമിടയിൽ യുദ്ധം തുടങ്ങിയത്. ഗാസയിൽ ഇസ്രായിൽ നടത്തിയ ആക്രമണത്തിൽ ഇതേവരെ 14000-ത്തിലേറെ പേരാണ് കൊല്ലപ്പെട്ടത്. ഇതിൽ ഭൂരിഭാഗവും സ്ത്രീകളും കുട്ടികളുമാണ്. ആശുപത്രികൾക്കും അഭയാർത്ഥി ക്യാമ്പുകൾക്കും നേരെ ഇസ്രായിൽ ആക്രമണം തുടർന്നു. ലോകരാജ്യങ്ങളിൽ ഭൂരിഭാഗവും ഇസ്രായിലിനോട് വെടിനിർത്തൽ പ്രഖ്യാപിക്കണമെന്ന് ആവശ്യപ്പെട്ടിരുന്നെങ്കിലും ഇസ്രായിൽ അതിന് തയ്യാറായിരുന്നില്ല. ഇന്ന്(ബുധൻ) പുലർച്ചെയാണ് ഇസ്രായിൽ വെടിനിർത്തൽ പ്രഖ്യാപിച്ചത്. ഇതുമായി ബന്ധപ്പെട്ട് ഖത്തറും ഹമാസും ഇസ്രായിലും പുറത്തിറക്കിയ പ്രസ്താവനകൾ വായിക്കാം

ഖത്തർ

''ഇസ്രായിലിനും ഇസ്ലാമിക് റെസിസ്റ്റൻസ് മൂവ്മെന്റിനും(ഹമാസ്) ഇടയിൽ ഈജിപ്ത്, അമേരിക്ക എന്നീ രാജ്യങ്ങളുടെ സഹകരണത്തോടെ നടത്തിയ സംയുക്ത മധ്യസ്ഥ ശ്രമങ്ങളുടെ വിജയം ഖത്തർ പ്രഖ്യാപിക്കുന്നു.
ഗാസക്കും ഇസ്രായിലിനുമിടയിൽ നാലു ദിവസത്തേക്കുള്ള താൽക്കാലിക വെടിനിർത്തൽ പ്രഖ്യാപിക്കും. ഇത് വ്യവസ്ഥകൾക്ക് വിധേയമായി നാലു മാസം വരെ നീണ്ടു നിന്നേക്കാം. ഇസ്രായിൽ ജയിലുകളിൽ തടവിലാക്കപ്പെട്ട നിരവധി ഫലസ്തീൻ സ്ത്രീകളെയും കുട്ടികളെയും മോചിപ്പിക്കുന്നതിന് പകരമായി നിലവിൽ ഗാസ മുനമ്പിൽ ബന്ദികളാക്കിയ 50 സിവിലിയൻ സ്ത്രീകളെയും കുട്ടികളെയും മോചിപ്പിക്കും. പിന്നീടുള്ള ഘട്ടങ്ങളിൽ മോചിപ്പിക്കപ്പെടുന്നവരുടെ എണ്ണം വർദ്ധിപ്പിക്കും. ഗാസയിലേക്ക് മാനുഷിക സഹായം, ഇന്ധനം, ആംബുലൻസ്,ദുരിതാശ്വാസ വാഹനങ്ങൾ കൂടുതലായി പ്രവേശിപ്പിക്കും. സംഘർഷം ലഘൂകരിക്കാനും രക്തച്ചൊരിച്ചിൽ തടയാനും സിവിലിയന്മാരെ സംരക്ഷിക്കാനുമുള്ള നയതന്ത്ര ശ്രമങ്ങളോടുള്ള പ്രതിബദ്ധത ഖത്തർ ഉറപ്പിക്കുന്നു. കരാറിലെത്താൻ അറബ് റിപ്പബ്ലിക് ഓഫ് ഈജിപ്തിന്റെയും യുണൈറ്റഡ് സ്റ്റേറ്റ്‌സ് ഓഫ് അമേരിക്കയുടെയും ശ്രമങ്ങളെ ഖത്തർ അഭിനന്ദിക്കുന്നു.

ഹമാസ് 

ഗാസ മുനമ്പിലെ നമ്മുടെ വീരന്മാരുടെ അചഞ്ചലതയെ പിന്തുണയ്ക്കുന്നതിനും അവരുടെ മുറിവുകൾക്ക് ആശ്വാസം നൽകുന്നതിനും ചികിത്സിക്കുന്നതിനുമുള്ള ഞങ്ങളുടെ അശ്രാന്ത പരിശ്രമത്തിലും നമ്മുടെ ഇച്ഛാശക്തി ഏകീകരിക്കാനുള്ള ഞങ്ങളുടെ പ്രവർത്തനത്തിലും ക്ഷമയും നിശ്ചയദാർഢ്യവുമുള്ള ഫലസ്തീൻ ജനത നൽകിയ പിന്തുണയിൽനിന്ന്  പ്രചോദനം ഉൾക്കൊള്ളുന്നു. 

ദിവസങ്ങളോളം നീണ്ട സങ്കീർണ്ണവും പ്രയാസകരവുമായ ചർച്ചകൾക്ക് ശേഷം, ഖത്തറിന്റെയും ഈജിപ്തിന്റെയും നിരന്തരവും അഭിനന്ദനാർഹവുമായ പരിശ്രമങ്ങളിലൂടെ, നാല് ദിവസത്തേക്ക് മാനുഷികമായ ഒരു വെടിനിർത്തൽ കരാറിൽ  എത്തിയതായി സർവശക്തനായ ദൈവത്തിന്റെ സഹായത്തോടെ ഞങ്ങൾ പ്രഖ്യാപിക്കുന്നു. ഗാസ മുനമ്പിലെ എല്ലാ മേഖലകളിലും അധിനിവേശ സൈന്യത്തിന്റെ എല്ലാ സൈനിക നടപടികളും അവസാനിപ്പിക്കുക, ഗാസ മുനമ്പിലേക്ക് ഇരച്ചെത്തുന്ന സൈനിക വാഹനങ്ങളുടെ വരവ് നിർത്തുക, ഗാസ മുനമ്പിലെ എല്ലാ മേഖലകളിലേക്കും  നൂറുകണക്കിന് മാനുഷിക, ദുരിതാശ്വാസ, വൈദ്യ, ഇന്ധന സഹായങ്ങൾ അനുവദിക്കുക, ബന്ദികളാക്കിയ 50 സ്ത്രീകളുടെയും 19 വയസ്സിന് താഴെയുള്ള കുട്ടികളുടെയും മോചനത്തിനും പകരമായി നമ്മുടെ ജനതയുടെ 150 സ്ത്രീകളെയും 19 വയസ്സിന് താഴെയുള്ള കുട്ടികളെയും ഇസ്രായിൽ മോചിപ്പിക്കുക, രാവിലെ 10 മുതൽ വൈകുന്നേരം 4 വരെ ദിവസവും ആറ് മണിക്കൂർ വടക്ക് ഭാഗത്തെ വിമാന ഗതാഗതം അവസാനിപ്പിക്കുക, വെടിനിർത്തൽ വേളയിൽ ഗാസ മുനമ്പിൽ ഒരിടത്തും ഇസ്രായിൽ ആരെയും ആക്രമിക്കുകയോ അറസ്റ്റ് ചെയ്യുകയോ ചെയ്യില്ലെന്ന് ഉറപ്പാക്കുക, സലാഹുദ്ദീൻ റോഡിലൂടെ ജനങ്ങളുടെ (വടക്ക് നിന്ന് തെക്കോട്ട്) സഞ്ചാര സ്വാതന്ത്ര്യം ഉറപ്പാക്കുക തുടങ്ങിയവയാണ് കരാറിലുള്ളത്. 

ഈ കരാറിന്റെ നിബന്ധനകൾ നമ്മുടെ ജനങ്ങളെ സേവിക്കുന്നതിനും ആക്രമണത്തെ അഭിമുഖീകരിക്കുന്ന അവരുടെ അചഞ്ചലത ശക്തിപ്പെടുത്തുന്നതിനും ലക്ഷ്യമിടുന്ന ചെറുത്തുനിൽപ്പിന്റെയും അതിന്റെ തത്ത്വങ്ങളുടെയും കാഴ്ചപ്പാടിന് അനുസൃതമായി രൂപപ്പെടുത്തിയതാണ്. നമ്മുടെ ജനതയുടെ ത്യാഗങ്ങൾ, കഷ്ടപ്പാടുകൾ, ആശങ്കകൾ എന്നിവയെക്കുറിച്ച് അത് എപ്പോഴും ഓർമ്മിക്കുന്നു. ചർച്ചകൾ നീട്ടിക്കൊണ്ടുപോകാനും മാറ്റിവെക്കാനുമുള്ള ഇസ്രായിലിന്റെ ശ്രമങ്ങൾക്കിടയിലും, സ്ഥിരതയാർന്ന പോരാട്ടത്തിന്റെയും തോറ്റുപോകാത്ത നമ്മുടെ ഇച്ഛാശക്തിയിലും നിന്നാണ് ഈ കരാറുണ്ടായത്. 
പോരാട്ട ഉടമ്പടിയുടെ ഒരു താൽക്കാലിക വിരാമത്തിന്റെ വരവ് ഞങ്ങൾ പ്രഖ്യാപിക്കുമ്പോഴും ഞങ്ങളുടെ കൈകൾ തോക്കിന്റെ ട്രിഗറിൽ തന്നെയുണ്ടായിരിക്കും. നമ്മുടെ വിജയികളായ സൈന്യം ഗാസയിലെ ജനങ്ങളെ പ്രതിരോധിക്കാനും അധിനിവേശത്തെയും അതിന്റെ ആക്രമണത്തെയും പരാജയപ്പെടുത്താനും ശ്രമിക്കും. 
നമ്മുടെ ജനങ്ങളുടെ രക്തത്തോടും അവരുടെ ത്യാഗങ്ങളോടും ക്ഷമയോടും ദൃഢതയോടും വിമോചനത്തിനും സ്വാതന്ത്ര്യത്തിനും അവകാശങ്ങൾ പുനഃസ്ഥാപിക്കുന്നതിനും സ്വതന്ത്ര ഫലസ്തീൻ രാഷ്ട്രം സ്ഥാപിക്കുന്നതിനുമുള്ള അവരുടെ അഭിലാഷങ്ങളോടും ഞങ്ങൾ വിശ്വസ്തരായിരിക്കുമെന്ന് വാഗ്ദാനം ചെയ്യുന്നു. ജറുസലേമിനെ തലസ്ഥാനമാക്കി ഒരു സ്വതന്ത്ര ഫലസ്തീൻ രാഷ്ട്രം സ്ഥാപിക്കുന്നതിനുമുള്ള നമ്മുടെ ജനങ്ങളുടെ അഭിലാഷങ്ങളോടും ഞങ്ങൾ വിശ്വസ്തരായിരിക്കുമെന്നും വാഗ്ദാനം ചെയ്യുന്നു. 

ഇസ്രായിൽ

ബന്ദികളാക്കിയ എല്ലാവരെയും നാട്ടിലേക്ക് തിരിച്ചയക്കാൻ ഇസ്രായിൽ സർക്കാർ ബാധ്യസ്ഥരാണ്. ഈ ലക്ഷ്യം കൈവരിക്കുന്നതിനുള്ള ആദ്യ ഘട്ടത്തിന്റെ രൂപരേഖ സർക്കാർ അംഗീകരിച്ചു. അതനുസരിച്ച് കുറഞ്ഞത് 50 ബന്ദികളെ - സ്ത്രീകളും കുട്ടികളും - നാല് ദിവസത്തിനുള്ളിൽ മോചിപ്പിക്കും. ഈ സമയത്ത് താൽക്കാലിക വെടിനിർത്തൽ പ്രാബല്യത്തിൽവരും. ഇതിന് പുറമെ ഓരോ പത്ത് ബന്ദികളെയും വിട്ടയച്ചാൽ വെടിനിർത്തൽ ഒരു ദിവസത്തേക്ക് കൂടി നീട്ടും. ഇസ്രായിൽ സർക്കാറും ഇസ്രായിൽ സൈന്യവും ഹമാസ് ബന്ദികളാക്കിയ എല്ലാവരെയും നാട്ടിലേക്ക് തിരിച്ചെത്തിക്കുന്നതിനും ഹമാസിനെ ഉന്മൂലനം ചെയ്യുന്നതിനും ഗാസയിൽനിന്ന് ഇസ്രായിൽ രാഷ്ട്രത്തിന് പുതിയ ഭീഷണിയൊന്നും ഉണ്ടാകില്ലെന്ന് ഉറപ്പാക്കുന്നതിനുമായി യുദ്ധം തുടരും.