കല്‍പ്പറ്റ - വയനാട് നടവയല്‍ സി എം കോളേജില്‍ കെ എസ് യു പ്രവര്‍ത്തകരും പ്രിന്‍സിപ്പലും തമ്മിലുണ്ടായ സംഘര്‍ഷത്തെ തുടര്‍ന്ന് പ്രിന്‍സിപ്പലിനെതിരെ പോലീസ് കേസെടുത്തു. കെ.എസ്.യു പ്രവര്‍ത്തകരുടെ പരാതിയില്‍ മര്‍ദ്ദനം ഉള്‍പ്പെടെയുള്ള വകുപ്പുകള്‍ പ്രകാരമാണ് പ്രിന്‍സിപ്പല്‍ ഡോ. എ.പി ഷെരീഫിനെതിരെ പനമരം പോലീസ് കേസെടുത്തിരിക്കുന്നത്. ഇന്ന് ഉച്ചയോടെയാണ് വയനാട് നടവയല്‍ സി എം കോളേജില്‍ കെ എസ് യു പ്രവര്‍ത്തകരും പ്രിന്‍സിപ്പലും തമ്മില്‍ കയ്യാങ്കളിയുണ്ടായത്. കോളേജ് അടപ്പിക്കാനെത്തിയ കെ എസ് യു പ്രവര്‍ത്തകരെ പ്രിന്‍സിപ്പല്‍ തടയുകയായിരുന്നു. ഇതോടെയുണ്ടായ വാക്കേറ്റമാണ് കയ്യാങ്കളിയില്‍ എത്തിയത്. പ്രിന്‍സിപ്പല്‍ മര്‍ദിച്ചെന്ന് കെ എസ് യു നേതാക്കള്‍ ആരോപിച്ചു. എന്നാല്‍ ആക്രമിക്കാന്‍ ശ്രമിച്ചപ്പോള്‍ പ്രതിരോധിക്കുകയായിരുന്നെന്നാണ് പ്രിന്‍സിപ്പല്‍ പറയുന്നത്.
