റിയാദ്- ലോകത്തെ ഊര്‍ജ കേന്ദ്രമായി മാറാനാണ് സൗദി അറേബ്യയും ഇന്ത്യയും ലക്ഷ്യമിടുന്നതെന്ന് ഇന്ത്യന്‍ ഊര്‍ജ മന്ത്രി രാജ് കുമാര്‍ സിംഗ്. റിയാദില്‍ നടക്കുന്ന മെന കാലാവസ്ഥാ വാരത്തോടനുബന്ധിച്ച് അല്‍ അറബിയക്ക് നല്‍കിയ അഭിമുഖത്തിലാണ് അദ്ദേഹം ഇക്കാര്യം പറഞ്ഞത്.
വെദ്യുതിയും ശുദ്ധ ഊര്‍ജവും ഉള്‍പ്പടെയുള്ള പ്രധാന വ്യവസായ മേഖലകളില്‍ ഇരു രാജ്യങ്ങളും ബന്ധം ശക്തമാക്കുകയാണ്. ഇലക്ട്രിക്കല്‍ ഇന്റര്‍കണക് ഷനുകള്‍, ഹൈഡ്രജന്‍, ശുദ്ധമായ ഊര്‍ജ വിതരണ ശൃംഖലകള്‍ എന്നിവ സംബന്ധിച്ച് സൗദി ഊര്‍ജ മന്ത്രി രാജകുമാരന്‍ അബ്ദുല്‍ അസീസ് ബിന്‍ സല്‍മാന്‍ രാജകുമാരനുമായി അദ്ദേഹം ധാരണാ പത്രങ്ങളില്‍ ഒപ്പുവെച്ചു.
കൂടുതല് വായിക്കുക
ഈ വിഭാഗത്തിൽ പോസ്റ്റ് ചെയ്ത അനുബന്ധ ലേഖനങ്ങൾ അടങ്ങിയിരിക്കുന്നു (Related Nodes field)
ഇരു രാജ്യങ്ങളും ഒരുമിച്ച് മുന്നേറിയാല്‍ ആര്‍ക്കും തോല്‍പ്പിക്കാന്‍ കഴിയില്ലെന്ന് മന്ത്രി രാജ്കുമാര്‍ സിംഗ് പറഞ്ഞു.
ഇന്ത്യയുടെ ശുദ്ധമായ ഊര്‍ജ ഉല്‍പ്പാദന ശേഷിയും സമൃദ്ധമായ സൂര്യപ്രകാശത്തിലേക്കുള്ള സൗദി അറേബ്യയുടെ ലഭ്യതയും സാമ്പത്തിക വൈദഗ്ധ്യവും ചൂണ്ടിക്കാട്ടിയ സിംഗ്, നിലവിലുള്ള വ്യവസ്ഥകളെ അടിസ്ഥാനമാക്കിയുള്ള പങ്കാളിത്തം ഊര്‍ജ്ജ വിതരണ ചെലവ് കുറയ്ക്കുമെന്ന് ചൂണ്ടിക്കാട്ടി.
വൈദ്യുതി ശൃംഖലയുടെ പരസ്പരബന്ധം അടിയന്തര സാഹചര്യങ്ങളില്‍ ഊര്‍ജം പങ്കിടാന്‍ സഹായിക്കും. ഊര്‍ജ്ജ ശൃംഖലകള്‍ പരസ്പരം ബന്ധിപ്പിക്കുന്നതിലൂടെ, സംഭരണവും ഊര്‍ജ്ജ സ്രോതസ്സും നിര്‍മ്മിക്കാനുള്ള ഇരു രാജ്യങ്ങളുടെയും ആവശ്യകത ഗണ്യമായി കുറയ്ക്കും. ഇതിന്റെ പ്രയോജനങ്ങള്‍ ഉപഭോക്താവിന് കൈമാറാന്‍ കഴിയും.
ഇരു രാജ്യങ്ങളും തമ്മിലുള്ള പതിവ് ബിസിനസ് ഉച്ചകോടികളും ബിസിനസ് ടു ബിസിനസ് ഇടപെടലുകളും അതത് ഊര്‍ജ്ജ മേഖലകളില്‍ സമ്പൂര്‍ണ്ണ വിതരണവും മൂല്യ ശൃംഖലയും സ്ഥാപിക്കാന്‍ സഹായകമാകും.
വൈദ്യുതിയുടെയും ഗ്രീന്‍ ഹൈഡ്രജന്റെയും വിതരണ ശൃംഖല കൈകാര്യം ചെയ്യുന്നതിനും കരാറിന്റെ പ്രയോജനങ്ങള്‍ പരമാവധി പ്രയോജനപ്പെടുത്തുന്നതിനുള്ള മാര്‍ഗങ്ങള്‍ ഇരു രാജ്യങ്ങളും പരിശോധിക്കുന്നുണ്ടെന്ന് സൗദി ഊര്‍ജ മന്ത്രി പറഞ്ഞു.
ഹരിത വൈദ്യുതിയുടെയും ഹരിത ഹൈഡ്രജന്റെയും വലിയ നിര്‍മ്മാതാവാകുക എന്ന പൊതു ലക്ഷ്യം തങ്ങള്‍ക്കുണ്ടെന്നും അബ്ദുല്‍ അസീസ് രാജകുമാരന്‍ പറഞ്ഞു.
സൗദി കിരീടാവകാശി മുഹമ്മദ് ബിന്‍ സല്‍മാനും ഇന്ത്യന്‍ പ്രധാനമന്ത്രി നരേന്ദ്ര മോഡിയും തമ്മില്‍ ഒപ്പുവച്ച സംയുക്ത കരാറുകളുടെ ഭാഗമായാണ് ആഴ്ചകള്‍ക്കുള്ളില്‍ ഊര്‍ജ പങ്കിടലും വിതരണ ശൃംഖലയും സംബന്ധിച്ച ധാരണാപത്രത്തില്‍ ഒപ്പുവെച്ചത്.
