ചെന്നൈ- സാമൂഹിക നീതിക്കും സമത്വത്തിനും എതിരായ സനാതന ധർമത്തെ എതിർത്താൽ മാത്രം പോരെന്നും നിർമാർജനം ചെയ്യണമെന്നും തമിഴ്‌നാട് മുഖ്യമന്ത്രി എംകെ സ്റ്റാലിന്റെ മകനും മന്ത്രിയുമായ ഉദയനിധി സ്റ്റാലിൻ പറഞ്ഞു. സനാതന ധർമം ഡെങ്കിപ്പനിക്കും മലേറിയക്കും സമാനമാണെന്നും അദ്ദേഹം പറഞ്ഞു.
കുറച്ച് കാര്യങ്ങൾ എതിർത്താൽ മാത്രം പോരാ അവ ഇല്ലാതാക്കണം. ഡെങ്കി, കൊതുകുകൾ, മലേറിയ, കൊറോണ എന്നിവയെ നമുക്ക് എതിർക്കാൻ കഴിയില്ല. അവ ഉന്മൂലനം ചെയ്യണം. അതുപോലെയാണ് സനാതന ധർമത്തെയും ഉന്മൂലനം ചെയ്യേണ്ടത്- ഉദയനിധിയെ ഉദ്ധരിച്ച് വാർത്താ ഏജൻസിയായ എഎൻഐ റിപ്പോർട്ട് ചെയ്തു. സനാതന എന്ന പേര് സംസ്കൃതത്തിൽ നിന്നാണ്. ഇത് സാമൂഹിക നീതിക്കും സമത്വത്തിനും എതിരാണ്- ഡിഎംകെ സർക്കാരിൽ യുവജനക്ഷേമ കായിക വികസന മന്ത്രിയായ ഉദയനിധി സ്റ്റാലിൻ പറഞ്ഞു.
ജനസംഖ്യയുടെ 80 ശതമാനത്തിന്റെ വംശഹത്യക്കാണ് ഉദയനിധി സ്റ്റാലിൻ ആഹ്വാനം ചെയ്തിരിക്കുന്നതെന്ന് ബിജെപി ഐടി സെൽ തലവൻ അമിത് മാളവ്യ ആരോപിച്ചു.
