ഹൈദരാബാദ്- സെപ്റ്റംബർ 18 മുതൽ 22 വരെ പാർലമെന്റിന്റെ പ്രത്യേക സമ്മേളനത്തിന് ആഹ്വാനം ചെയ്തിരിക്കെ ചൈനയെക്കുറിച്ച് ചർച്ച നടത്താൻ പ്രധാനമന്ത്രി മോഡി അനുവദിക്കുമെന്നാണ് പ്രതീക്ഷയെന്ന് എഐഎംഐഎം പ്രസിഡന്റും ലോക്‌സഭാ എംപിയുമായ അസദുദ്ദീൻ ഉവൈസി പറഞ്ഞു.ഐഎസ്ആർഒ ശാസ്ത്രജ്ഞരെയും ലോക ചാമ്പ്യൻ നീരജ് ചോപ്രയെയും പാർലമെന്റിലേക്ക് ക്ഷണിച്ച് ആദരിക്കണമെന്ന് അദ്ദേഹം ആവശ്യപ്പെട്ടു.
ഇന്ത്യയുടെ 2000 ചതുരശ്ര കിലോമീറ്റർ ഭൂമി ചൈന കൈയേറിയിരിക്കെ, തുടക്കം മുതൽ ഞങ്ങൾ പാർലമെൻറിൻറെ പ്രത്യേക സമ്മേളനം ആവശ്യപ്പെട്ടിരുന്നു. ഡെപ്‌സാംഗിനെയും ഡെംചോക്കിനെയും ചൈന കൈവിടുന്നില്ല. പ്രത്യേക സെഷൻ വിളിച്ചിരിക്കെ, ചൈനയെക്കുറിച്ച് ചർച്ച നടത്താൻ പ്രധാനമന്ത്രി അനുവദിക്കുമെന്ന് പ്രതീക്ഷിക്കുന്നു. രോഹിണി കമ്മീഷൻ റിപ്പോർട്ട് നൽകിയിരിക്കെ, 50 ശതമാനം സംവരണ പരിധി ലംഘിക്കാൻ മോദി സർക്കാർ പ്രത്യേക സമ്മേളനത്തിൽ ഒരു ബിൽ കൊണ്ടുവരണമെന്നും ഞങ്ങൾ ആവശ്യപ്പെടുകയാണെന്ന് ഉവൈസി പറഞ്ഞു.
ഐഎസ്ആർഒ ശാസ്ത്രജ്ഞരെയും നീരജ് ചോപ്രയെയും പാർലമെന്റിലേക്ക് ക്ഷണിച്ച് ആദരിക്കണമെന്നാണ് ഞങ്ങളുടെ മറ്റൊരു ആവശ്യം. ഒരു രാഷ്ട്രം, ഒരു തിരഞ്ഞെടുപ്പ് എന്ന ഊഹാപോഹം അവസാനിപ്പിക്കണം. അത് നടക്കാത്ത കാര്യമാണ്. ഫെഡറലിസം ഇന്ത്യയുടെ അടിസ്ഥാന ഘടനയുടെ ഭാഗമായതിനാൽ അത് ഇന്ത്യൻ ഭരണഘടനയ്ക്ക് വിരുദ്ധമായിരിക്കും. ബിജെപിക്ക് രാജ്യസഭയിൽ ഭൂരിപക്ഷമില്ല. കൂടാതെ, പ്രതിപക്ഷം ഭരിക്കുന്ന പല സംസ്ഥാനങ്ങളും ഇത് അംഗീകരിക്കില്ല. ശീതകാല സമ്മേളനം എപ്പോൾ നടക്കുമെന്ന് മോഡി സർക്കാർ രാജ്യത്തോട് പറയണമെന്നും ഉവൈസി കൂട്ടിച്ചേർത്തു. സെപ്റ്റംബർ 18 മുതൽ 22 വരെ പാർലമെന്റിന്റെ പ്രത്യേക സമ്മേളനം വിളിക്കാനും അഞ്ച് സിറ്റിംഗുകൾ നടത്താനും സർക്കാർ തീരുമാനിച്ചിട്ടുണ്ട്. പാർലമെന്ററി കാര്യ മന്ത്രി പ്രഹ്ലാദ് ജോഷിയാണ് ഇക്കാര്യം അറിയിച്ചത്.
