ന്യൂദൽഹി- സർണാഭരണത്തിനു പണം നൽകിയതിന്റെ വ്യാജ സ്‌ക്രീൻഷോട്ട് കാണിച്ച് മൂന്നു ലക്ഷം രൂപ തട്ടി. ദൽഹി ആസ്ഥാനമായുള്ള ജ്വല്ലറി ഉടമയെയാണ് കബളിപ്പിച്ച് മൂന്ന് ലക്ഷം രൂപ തട്ടിയെടുത്തത്..
ചാന്ദ്‌നി ചൗക്കിൽ ജ്വല്ലറി നടത്തിവരുന്ന നവൽ കിഷോർ ഖണ്ഡേൽവാളും മക്കളുമാണ് തട്ടിപ്പിനിരയായത്. ഖണ്ഡേൽവാളും മക്കളും നിയന്ത്രിക്കുന്ന അഞ്ച് പതിറ്റാണ്ട് പഴക്കമുള്ള ജ്വല്ലറിയിലാണ് തട്ടിപ്പ്. ഖണ്ഡേൽവാൾ നഗരത്തിന് പുറത്തായിരുന്നപ്പോൾ കടയിലേക്ക് അജ്ഞാത നമ്പറിൽ നിന്ന് കോൾ വന്നു. 15 ഗ്രാം സ്വർണ്ണ ചെയിനായിരുന്നു ആവശ്യം. ഖണ്ഡേൽവാളിന്റെ മക്കളുമായാണ് ഇടപാട് തീരുമാനിച്ചത്. തനിക്ക് കടയിലേക്ക് വരാൻ കഴിയില്ലെന്നും പണം ഓൺലൈനായി നൽകുമെന്നും വിളിച്ചയാൾ പറഞ്ഞു.
പണം ട്രാൻസ്ഫർ ചെയ്യാൻ അദ്ദേഹം ഖണ്ഡേൽവാളിന്റെ ഇന്റർനെറ്റ് ബാങ്കിംഗ് വിശദാംശങ്ങൾ ആവശ്യപ്പെടുകയും ചെയ്തു. ഇതിനുശേഷം, തന്റെ അക്കൗണ്ടിലേക്ക് 93,400 രൂപ ക്രെഡിറ്റ് ചെയ്തതായി ഖണ്ഡേൽവാളിന്റെ ഫോണിൽ സന്ദേശം ലഭിച്ചു. സന്ദേശം യഥാർത്ഥമാണെന്ന് വിശ്വസിച്ച്, ഖണ്ഡേൽവാൾ സ്‌ക്രീൻഷോട്ട് മക്കൾക്ക് അയച്ചുകൊടുത്തു. വിളിച്ചയാൾ നൽകിയ വിലാസത്തിൽ സ്വർണ്ണ ചെയിൻ എത്തിക്കുകയും ചെയ്തു.
