ന്യൂദൽഹി-രക്ഷാബന്ധൻ ആഘോഷത്തിൽ രാഖി കെട്ടാൻ ഒരു സഹോദരൻ വേണമെന്ന് ആവശ്യപ്പെട്ട മകൾക്ക് ഒരു മാസം പ്രായമുള്ള ആൺകുഞ്ഞിനെ തട്ടിയെടുത്തു കൊണ്ടുപോയി കൊടുത്ത കേസിൽ ദമ്പതികൾ അറസ്റ്റിൽ. ദൽഹിയിലെ
ടാഗോർ ഗാർഡനിലെ രഘുബീർ നഗറിലെ താമസക്കാരായ സഞ്ജയ് ഗുപ്ത (41), അനിത ഗുപ്ത (36) എന്നിവരെയാണ് അറസ്റ്റ് ചെയ്തതു. ഇവരുടെ 17 കാരനായ മകൻ കഴിഞ്ഞ വർഷം മരിച്ചിരുന്നു. ഈ വർഷം രക്ഷാബന്ധൻ ആഘോഷത്തിൽ രാഖി കെട്ടാൻ ഒരു സഹോദരനെ വേണമെന്ന് മകൾ ആവശ്യപ്പെട്ടതോടെയാണ് ഇവർ കുഞ്ഞിനെ തട്ടിക്കൊണ്ടുപോയത്.
വ്യാഴാഴ്ച പുലർച്ചെ 4.34-നാണ് വികലാംഗയായ സ്ത്രീയുടെ കുഞ്ഞിനെ തട്ടിക്കൊണ്ടുപോയ വിവരം പോലീസിന് ലഭിച്ചത്. ഛട്ടാ റെയിൽ ചൗക്കിലെ നടപ്പാതയിൽ താമസിക്കുന്ന ദമ്പതികളുടെ കുഞ്ഞിനെയാണ് തട്ടിക്കൊണ്ടുപോയത്. പുലർച്ചെ 3 മണിയോടെ ഉണർന്നപ്പോൾ തങ്ങളുടെ കുട്ടിയെ കാണാനില്ലെന്ന് കണ്ടെത്തിയതായും ആരോ തട്ടിക്കൊണ്ടുപോയതായി സംശയിക്കുന്നതായും വ്യക്തമാക്കി ഇവർ പോലീസിനെ സമീപിച്ചു. സമീപത്തെ സിസിടിവി ക്യാമറകൾ പരിശോധിച്ചപ്പോൾ ബൈക്കിലെത്തിയ രണ്ടുപേർ പ്രദേശത്ത് കറങ്ങുന്നത് കണ്ടെത്തി. തുടർന്ന് 400 ഓളം സിസിടിവി ക്യാമറകൾ പരിശോധിച്ച് പ്രതികളിലേക്കെത്തി. ആരോപണവിധേയമായ ബൈക്ക് സഞ്ജയ് എന്നയാളുടെ പേരിൽ രജിസ്റ്റർ ചെയ്തതാണെന്ന് കണ്ടെത്തി. 15 ഓളം പോലീസ് ഉദ്യോഗസ്ഥരും വനിതാ ജീവനക്കാരും ആയുധങ്ങളുമായി പ്രദേശം വളഞ്ഞു. ടാഗോർ ഗാർഡനിലെ രഘുബീർ നഗറിലുള്ള സി-ബ്ലോക്കിലേക്ക് പോയ അവർ പ്രതികളായ ദമ്പതികളെയും തട്ടിക്കൊണ്ടുപോയ കുട്ടിയെയും കണ്ടെത്തി.
കഴിഞ്ഞ വർഷം ഓഗസ്റ്റ് 17 ന് തങ്ങളുടെ കൗമാരക്കാരനായ മകൻ ടെറസിൽ നിന്ന് വീണ് മരിച്ചുവെന്നും 15 വയസ്സുള്ള മകൾ വരാനിരിക്കുന്ന രക്ഷാബന്ധൻ ദിനത്തിൽ രാഖി കെട്ടാൻ ഒരു സഹോദരനെ ആവശ്യപ്പെടുകയായിരുന്നുവെന്നും സഞ്ജയും അനിതയും വെളിപ്പെടുത്തി.
അങ്ങനെ അവർ ഒരു ആൺകുട്ടിയെ തട്ടിക്കൊണ്ടുപോകാൻ തീരുമാനിച്ചു. ഛട്ടാ റെയിൽ ചൗക്കിന് സമീപം അമ്മയിൽ നിന്ന് കുറച്ച് അകലെ ഉറങ്ങുന്ന ഈ കുഞ്ഞിനെ ദമ്പതികൾ കണ്ടെത്തി. അവനെ തങ്ങളുടെ മകനായി പരിപാലിക്കാൻ തട്ടിക്കൊണ്ടുപോകുകയായിരുന്നു. കുഞ്ഞിന്റെ അമ്മയ്ക്ക് രണ്ട് കൈകൾക്കും കാലുകൾക്കും വൈകല്യമുണ്ട്. അച്ഛൻ തുണിക്കടയിൽ ജോലി ചെയ്യുകയാണ്. വീടില്ലാത്ത ഇവർ ഫുട്പാത്തിലാണ് താമസിക്കുന്നതെന്നും പോലീസ് പറഞ്ഞു.
