പൂനെ- പാർട്ടിയിലെ സമീപകാല പിളർപ്പുകളുടെയും കൂറുമാറ്റങ്ങളുടെയും വിഷയത്തിൽ കാരണം വെളിപ്പെടുത്തി നാഷണലിസ്റ്റ് കോൺഗ്രസ് പാർട്ടി (എൻസിപി) നേതാവ് ശരദ് പവാർ. പാർട്ടി സംഘടിപ്പിച്ച സോഷ്യൽ മീഡിയ മീറ്റിംഗിലാണ് പിളർപ്പിലും ചിലർ എൻ.സി.പി വിട്ടതിലും കേന്ദ്രം ആരംഭിച്ച എൻഫോഴ്‌സ്‌മെന്റ് ഡയറക്ടറേറ്റിന്റെ (ഇഡി) അന്വേഷണത്തിനു പങ്കുണ്ടെന്ന് അദ്ദേഹം പറഞ്ഞത്.
വികസന ആവശ്യങ്ങൾക്കായി സർക്കാരിൽ ചേരുമെന്ന അവരുടെ അവകാശവാദം അദ്ദേഹം തള്ളി. ഞങ്ങളുടെ ചില അംഗങ്ങൾ ഞങ്ങളെ വിട്ടുപോയി. അവർ (അജിത് പവാർ വിഭാഗം) പറയുന്നത് തങ്ങൾ വികസനത്തിന് വേണ്ടി പോയി എന്നാണ്, എന്നാൽ ഇത് ഒട്ടും ശരിയല്ല. കേന്ദ്രസർക്കാർ ഇഡി അന്വേഷണം ആരംഭിച്ചതോടെയാണ് ഇവർ എൻസിപി വിട്ടത്. ബി.ജെ.പിയോടോപ്പം ചേർന്നില്ലെങ്കിൽ മറ്റെവിടെയെങ്കിലും അയക്കുമെന്നാണ് ചില അംഗങ്ങളോട് പറഞ്ഞത്- ശരദ് പവാർ ചൂണ്ടിക്കാട്ടി.
ഇ.ഡി അന്വേഷണങ്ങളെ അഭിമുഖീകരിച്ചപ്പോൾ വിവിധ പാർട്ടി അംഗങ്ങൾ പ്രകടിപ്പിച്ച വിപരീത പ്രതികരണങ്ങളിലേക്കും പവാർ ശ്രദ്ധ ക്ഷണിച്ചു. ചിലർ സൂക്ഷ്മപരിശോധനയിൽ നിന്ന് ഒഴിഞ്ഞുമാറാൻ പാർട്ടിയിൽ നിന്ന് പുറത്തുപോകാൻ തീരുമാനിച്ചപ്പോൾ, അനിൽ ദേശ്മുഖിനെപ്പോലുള്ള മറ്റുള്ളവർ തങ്ങളുടെ പാർട്ടി ആശയങ്ങളോടുള്ള പ്രതിബദ്ധതയും പ്രകടിപ്പിച്ചു.
ചില അംഗങ്ങൾ അന്വേഷണം നേരിടാൻ തയ്യാറായിരുന്നു. മുൻ ആഭ്യന്തര മന്ത്രി അനിൽ ദേശ്മുഖ് 14 മാസം ജയിലിലായിരുന്നു. ദേശ്മുഖിനോട് പോലും നിലപാട് മാറ്റാൻ ആവശ്യപ്പെട്ടിരുന്നുവെങ്കിലും അദ്ദേഹം എൻ.സി.പി വിടില്ലെന്ന തീരുമാനത്തിൽ ഉറച്ചുനിന്നുവെന്ന് അദ്ദേഹം പറഞ്ഞു.
