ന്യൂദൽഹി-സുഹൃത്തിന്റെ മകളെ ദൽഹി വനിതാ ശിശുവികസന വകുപ്പിലെ മുതിർന്ന ഉദ്യോഗസ്ഥൻ മാസങ്ങളോളം ബലാത്സംഗം ചെയ്തു. സ്വന്തം ഭാര്യയുടെ ഒത്താശയോടെയാണ് ഇയാൾ പീഡനം നടത്തിയത്. പീഡനത്തിനിടെ ഗർഭിണിയായ കുട്ടിക്ക് മകനെ കൊണ്ട് ഗർഭം അലസിപ്പിക്കാനുള്ള ഗുളിക വാങ്ങിപ്പിച്ച് പ്രതിയുടെ ഭാര്യ ഗർഭം അലസിപ്പിക്കുകയും ചെയ്തു. പതിനാലാം വയസ് മുതലാണ് ഇയാൾ കുട്ടിയെ പീഡിപ്പിക്കാൻ തുടങ്ങിയത്. കുട്ടി നിലവിൽ പ്ലസ് ടു വിദ്യാർഥിനിയാണ്. 2020ൽ അച്ഛൻ മരിച്ചതോടെയാണ് പെൺകുട്ടി പീഡനത്തിന് ഇരയായി തുടങ്ങിയത്. അച്ഛൻ മരിച്ചതോടെ തന്റെ സുഹൃത്തിന്റെ മകൾ കൂടിയായ കുട്ടിയെ സ്വന്തം വീട്ടിലേക്ക് കൊണ്ടുവരികയായിരുന്നു. തുടർന്നാണ് പീഡനം നടത്തിയത്. 2020 നും 2021 നും ഇടയിൽ ഇയാൾ പലതവണ ബലാത്സംഗം ചെയ്‌തെന്നാണ് പരാതി. കൗമാരക്കാരി ഗർഭിണിയായപ്പോൾ പ്രതി ഇക്കാര്യം തന്റെ ഭാര്യയോട് തുറന്നുപറഞ്ഞു. ഉദ്യോഗസ്ഥന്റെ ഭാര്യ മകനോട് മരുന്ന് വാങ്ങാൻ ആവശ്യപ്പെട്ടെന്നും ഗർഭം വീട്ടിൽ വെച്ച് തന്നെ അലസിപ്പിച്ചുവെന്നും പ്രായപൂർത്തിയാകാത്ത പെൺകുട്ടി പോലീസിന് നൽകിയ പരാതിയിൽ പറയുന്നു. പെൺകുട്ടി ഇപ്പോൾ ചികിത്സയിലാണ്. മജിസ്‌ട്രേറ്റിന് മുന്നിൽ മൊഴി രേഖപ്പെടുത്താനുണ്ട്. ഇന്ത്യൻ ശിക്ഷാ നിയമത്തിലെ നിരവധി വകുപ്പുകൾ പ്രകാരവും കുട്ടികളെ ദുരുപയോഗം ചെയ്യുന്ന കേസുകൾ പരിശോധിക്കുന്നതിനുള്ള കർശനമായ പോക്‌സോ നിയമപ്രകാരവും ദൽഹി പോലീസ് മുതിർന്ന ഉദ്യോഗസ്ഥനെതിരെ എഫ്‌ഐആർ രജിസ്റ്റർ ചെയ്തു. ഉന്നത ഉദ്യോഗസ്ഥനെതിരെയുള്ള ഗുരുതര ആരോപണങ്ങളിൽ ദൽഹി പോലീസ് കൂടുതൽ അന്വേഷണം നടത്തിവരികയാണ്.
