ന്യൂഡൽഹി - രാജ്യത്ത് തക്കാളി ഉൾപ്പെടെയുള്ള നിത്യോപയോഗ സാധനങ്ങളുടെ വിലക്കയറ്റത്തിനെതിരെ തക്കാളി മാല അണിഞ്ഞ് പ്രതിഷേധം. ആം ആദ്മി പാർട്ടി എം.പി സുശീൽ ഗുപ്തയാണ് തക്കാളിയും ഇഞ്ചിയും കോർത്ത മാല കഴുത്തിൽ അണിഞ്ഞ് പാർലമെന്റിലെത്തിയത്.
വിലക്കയറ്റത്തിൽ പൊതുജനം വലയുകയാണെന്നും ഇത്തരമൊരു സാഹചര്യത്തിൽ കേന്ദ്രസർക്കാരിനെ ഉണർത്തേണ്ടത് ആവശ്യമാണെന്നും അദ്ദേഹം പറഞ്ഞു. വിലക്കയറ്റത്തിന്റെ തീയിൽ രാജ്യം മുഴുവൻ എരിയുകയാണ്. ഇത് തടയാൻ സർക്കാർ ഒന്നും ചെയ്യുന്നില്ല. ഇന്ധനവില 100 രൂപ കടന്നു. വിലക്കയറ്റത്തെക്കുറിച്ചോ മണിപ്പൂരിനെക്കുറിച്ചോ സർക്കാർ മിണ്ടുന്നില്ല. അതുകൊണ്ടാണ് ഇന്ന് തക്കാളിമാലയും അണിഞ്ഞ് സഭയിൽ വന്നതെന്നും എം.പി വ്യക്തമാക്കി.
