കോട്ടയം - പുതുപ്പള്ളിയിലെ കോൺഗ്രസ് സ്ഥാനാർത്ഥിയെ കുറിച്ച് ഒന്നും പറയാനില്ലെന്നും അതേക്കുറിച്ച് പറയേണ്ടത് പാർട്ടിയാണെന്നും ഉമ്മൻചാണ്ടിയുടെ മകനും യൂത്ത് കോൺഗ്രസ് നേതാവുമായ ചാണ്ടി ഉമ്മൻ പറഞ്ഞു. ഉമ്മൻചാണ്ടിയുടെ കല്ലറയിലെത്തി പ്രാർത്ഥിച്ച് മടങ്ങവേ മാധ്യമപ്രവർത്തകരുടെ ചോദ്യങ്ങളോടായാണ് ചാണ്ടി ഉമ്മന്റെ പ്രതികരണം.
ഉപതെരഞ്ഞെടുപ്പ് പ്രഖ്യാപനത്തിന് പിന്നാലെ തടിച്ചുകൂടിയ പാർട്ടി പ്രവർത്തകർക്കു മുമ്പിലേക്ക് എത്തിയപ്പോൾ ആരാധകർ ത്രിവർണ ഷാൾ അണിയിക്കാൻ ശ്രമിച്ചപ്പോൾ അണിയിക്കരുതെന്ന് പറഞ്ഞ് ചാണ്ടി ഉമ്മൻ നിരുത്സാഹപ്പെടുത്തി. മാധ്യമങ്ങൾ സ്ഥാനാർത്ഥിത്വം സംബന്ധിച്ച ചോദ്യങ്ങൾ ആവർത്തിച്ചപ്പോൾ ഇപ്പോൾ ദയവ് ചെയ്ത് അതേക്കുറിച്ച് ഒന്നും ചോദിക്കരുതെന്നും അത് ശരിയല്ലെന്നും എല്ലാം പാർട്ടി നേതൃത്വത്തോട് ആരായൂവെന്നുമായിരുന്നു മറുപടി.
