ഭിൽവാര- രാജസ്ഥാനിലെ ഭിൽവാര ജില്ലയിലെ ഇഷ്ടിക ചൂളയിൽ പതിനാല് വയസ്സുള്ള പെൺകുട്ടിയുടെ കത്തിക്കരിഞ്ഞ മൃതദേഹം കണ്ടെത്തി. അമ്മയോടൊപ്പം ആട്‌മേയ്ക്കാനിറങ്ങിയ പെൺകുട്ടിയെ പിന്നീട് കാണാതാവുകയായിരുന്നു. കുട്ടിയെ കാണാത്തതിനെ തുടർന്ന് അവളുടെ വീട്ടുകാരും നാട്ടുകാരും പെൺകുട്ടിയെ രാത്രി മുഴുവൻ അന്വേഷിച്ചിരുന്നു. വ്യാഴാഴ്ച പുലർച്ചെ അവളുടെ വീടിനടുത്തുള്ള ഒരു വയലിൽ ഒരു ഇഷ്ടിക ചൂളയിൽ പെൺകുട്ടിയുടെ മൃതദേഹം കണ്ടെത്തി. കത്തുന്ന അവശിഷ്ടങ്ങളിൽ നിന്ന് എല്ലുകളും വെള്ളി പാദസരവും ചെരുപ്പുകളും പോലീസ് കണ്ടെത്തി.
കൊല്ലപ്പെടുന്നതിന് മുമ്പ് പെൺകുട്ടി കൂട്ടമാനഭംഗത്തിനിരയായതായി പോലീസ് സംശയിക്കുന്നു. സംഭവസ്ഥലത്ത് നിന്ന് പിടികൂടിയ പ്രദേശവാസികളായ മൂന്ന് പേരെ കസ്റ്റഡിയിലെടുത്ത് ചോദ്യം ചെയ്തുവരികയാണ്. രോഷാകുലരായ നൂറുകണക്കിന് ഗ്രാമീണർ സംഭവസ്ഥലത്ത് തടിച്ചുകൂടി, നീതിയും വേഗത്തിലുള്ള അറസ്റ്റും ആവശ്യപ്പെട്ട് പ്രതിഷേധിച്ചു. ഇന്നലെ പെൺകുട്ടിയെ കാണാതായെന്ന പരാതിയിൽ പോലീസ് വൈകിയാണ് പ്രതികരിച്ചതെന്നും തിരിച്ചറിയൽ രേഖയും ജനന സർട്ടിഫിക്കറ്റും ആവശ്യപ്പെട്ടതായും ഇവർ ആരോപിച്ചു.
ഈ വർഷം അവസാനം രാജസ്ഥാനിൽ തിരഞ്ഞെടുപ്പ് നടക്കാനിരിക്കെ, മുൻ മന്ത്രി ഉൾപ്പെടെയുള്ള ബിജെപി നേതാക്കൾ സ്ഥലത്തെത്തി പ്രതിഷേധത്തിൽ പങ്കുചേർന്നു. രാജസ്ഥാനിൽ അടുത്തിടെ സ്ത്രീകൾക്കും പെൺകുട്ടികൾക്കും എതിരായ കുറ്റകൃത്യങ്ങളിൽ സംസ്ഥാനം ഭരിക്കുന്ന കോൺഗ്രസിനെയും മുഖ്യമന്ത്രി അശോക് ഗെലോട്ടിനെയും ബിജെപി ലക്ഷ്യമിടുന്നുണ്ട്.
