കൽപ്പറ്റ - വയനാട് കാരാപ്പുഴയോട് ചേർന്ന് പശുവിന് പുല്ലെരിയാൻ പോയ ആളെ കാണാതായി. മീനങ്ങാടി മുരണി കുണ്ടുവയലിൽ കീഴാനിക്കൽ സുരേന്ദ്രനെ(55)യാണ് കാണാതായത്. കാരാപ്പുഴ ഡാമിൽനിന്ന് വെള്ളം തുറന്നുവിടുന്ന കുണ്ടുവയൽ പുഴയോട് ചേർന്ന ഭാഗത്ത് പുല്ലെരിയുന്നതിനിടെയാണ് കാണാതായത്.
സമീപത്ത് പുഴയിലേക്ക് വലിച്ചിഴച്ച പാടുകൾ കണ്ടെത്തിയിട്ടുണ്ട്. സുരേന്ദ്രന്റെ ചെരുപ്പും പുഴയ്ക്ക് സമീപത്തുനിന്ന് കണ്ടെത്തിയിട്ടുണ്ട്. കരച്ചിൽ കേട്ടതായും സമീപവാസികൾ പറയുന്നു. അജ്ഞാത ജീവിയുടെ ആക്രമണം ഉണ്ടായതായും സംശയമുണ്ട്. എൻ.ഡി.ആർ.എഫും ഫയർ ഫോഴ്‌സും ചേർന്ന് വ്യാപകമായ തിരച്ചിൽ നടത്തിയെങ്കിലും ഇതുവരെയും കണ്ടെത്താനായിട്ടില്ല. തിരച്ചിലിനെ തുടർന്ന് കാരാപ്പുഴ ഡാമിന്റെ ഷട്ടറുകൾ അടച്ചിരിക്കുകയാണ്.
