ബംഗളൂരു- സ്ത്രീകള്‍ക്ക് സൗജന്യ ബസ് യാത്ര നല്‍കുന്ന കര്‍ണാടകയിലെ കോണ്‍ഗ്രസ് സര്‍ക്കാരിന്റെ ശക്തി പദ്ധതി ചൊവ്വാഴ്ച ഒരു മാസം പൂര്‍ത്തിയാക്കി. ഇതിനകം 16 കോടിയിലധികം സ്ത്രീ യാത്രക്കാര്‍ പദ്ധതി പ്രയോജനപ്പെടുത്തിയതായി ഗതാഗത വകുപ്പ് അറിയിച്ചു. ജൂലൈ നാലിനാണ് ഏറ്റവും കൂടുതല്‍ സ്ത്രീ യാത്രക്കാര്‍ കയറിയത്.
ശക്തി പദ്ധതി നടപ്പാക്കിയ ശേഷം യാത്രക്കാരുടെ എണ്ണവും വരുമാനവും വര്‍ദ്ധിച്ചതായി ഗതാഗത വകുപ്പിന്റെ കണക്കുകള്‍ പറയുന്നു.
കര്‍ണാടക ഗതാഗത വകുപ്പിന്റെ കണക്കനുസരിച്ച്, കഴിഞ്ഞ ഒരു മാസത്തിനിടെ 16.73 കോടി വനിതാ യാത്രക്കാര്‍ സംസ്ഥാനത്ത് യാത്ര ചെയ്തു, അതില്‍ ജൂലൈ 4 ന് മാത്രം 70 ലക്ഷം സ്ത്രീകള്‍ യാത്ര ചെയ്തു. കര്‍ണാടക തലസ്ഥാനമായ ബെംഗളൂരു മെട്രോപൊളിറ്റന്‍ ട്രാന്‍സ്പോര്‍ട്ടേഷന്‍ കോര്‍പ്പറേഷന്‍ (ബിഎംടിസി) ബസുകളില്‍ കഴിഞ്ഞ ഒരു മാസത്തിനിടെ ഏറ്റവും കൂടുതല്‍ വനിതാ യാത്രക്കാര്‍ ഉണ്ടായി. അഞ്ച് കോടിയിലധികം സ്ത്രീകള്‍ ഈ ബസുകളില്‍ യാത്ര ചെയ്തു. വനിതാ യാത്രക്കാര്‍ക്ക് കഴിഞ്ഞ ഒരു മാസത്തെ ടിക്കറ്റ് മൂല്യം കണക്കാക്കിയാല്‍ കര്‍ണാടക സര്‍ക്കാരിന് 401 കോടി ചെലവായി. നാല് ട്രാന്‍സ്‌പോര്‍ട്ട് കോര്‍പ്പറേഷനുകളും ചേര്‍ന്ന് ആവശ്യം നിറവേറ്റുന്നതിനായി അധിക പ്രതിദിന സര്‍വീസുകളും നടത്തി.
