മക്ക - വിശുദ്ധ ഹറമിൽ പുനർനിർമിക്കുന്ന കിംഗ് അബ്ദുൽ അസീസ് കവാടത്തോടു ചേർന്ന മിനാരങ്ങളിൽ ചന്ദ്രക്കലകൾ സ്ഥാപിച്ചു. ഇസ്‌ലാമിക വാസ്തുവിദ്യയുടെയും വിശുദ്ധ ഹറമിന്റെയും പ്രധാനപ്പെട്ട അടയാളങ്ങളിൽ ഒന്നാണ് കിംഗ് അബ്ദുൽ അസീസ് കവാടത്തിലെ മിനാരങ്ങൾ. ഇവക്ക് 130 മീറ്ററിലേറെ ഉയരമുണ്ടെന്ന് ഹറംകാര്യ വകുപ്പ് അണ്ടർ സെക്രട്ടറി എൻജിനീയർ മുഹമ്മദ് അൽവഖ്ദാനി പറഞ്ഞു.
മിനാരങ്ങളിൽ സ്ഥാപിച്ച ചന്ദ്രക്കലകൾക്ക് ഒമ്പതു മീറ്റർ ഉയരമുണ്ട്. ഇവയുടെ അടിത്തറക്ക് രണ്ടു മീറ്റർ വീതിയുണ്ട്. കാർബൺ ഫൈബർ മെറ്റീരിയൽ ഉപയോഗിച്ചാണ് ചന്ദ്രക്കലകൾ നിർമിച്ചിരിക്കുന്നത്. ഇവയെ ഗിൽഡഡ് ഗ്ലാസ് കൊണ്ട് പൊതിഞ്ഞിരിക്കുന്നു. ചന്ദ്രക്കലകളുടെ ഉൾവശം ഇരുമ്പ് കൊണ്ടാണ് നിർമിച്ചിരിക്കുന്നത്. പ്രത്യേക ക്രെയിനുകളും ഉപകരണങ്ങളും ഉപയോഗിച്ച് മികച്ച അന്താരാഷ്ട്ര സാങ്കേതിക സമ്പ്രദായങ്ങൾക്കും മാനദണ്ഡങ്ങൾക്കും അനുസൃതമായാണ് ചന്ദ്രക്കലകൾ മിനാരങ്ങൾക്കു മുകളിൽ സ്ഥാപിച്ചതെന്നും എൻജിനീയർ മുഹമ്മദ് അൽവഖ്ദാനി പറഞ്ഞു.
